Qaırat Satybaldyuly ustalyp, ýaqytsha ustaý ızolátoryna qamaldy. Bul týraly "Qazaqstan" ulttyq arnasy málim etti.

"Sybaılas jemqorlyqqa qarsy qyzmet laýazymdyq ókilettikterin asyra paıdalaný jáne "Qazaqtelekom" AQ-nyń qarajatyn asa iri kólemde urlaý faktileri boıynsha qylmystyq isti tergeýde.

Atalǵan qylmystardy jasady degen kúdikpen Qaırat Satybaldyuly ustalyp, ýaqytsha ustaý ızolátoryna qamaldy.

Q. Satybaldyulynyń memleket qaýipsizdigine nuqsan keltiretin basqa da qylmystarǵa qatystylyǵy tekserilýde" delingen habarlamada.

Keı derekkózder Qaırat Satybaldy Túrkıaǵa ketkeli jatqanynda ustalǵanyn jazdy.

Qaırat Satybaldy eks-prezıdent Nursultan Nazarbaevtyń marqum inisi Satybaldynyń uly. Eldegi baı adamdardyń biri. Kezinde ulttyq qaýipsizdik komıtetinde, "Kazakh Oil", "Qazaqstan temir joly" ulttyq kompanıalarynda istegen. "Kaspi.kz" aksıonerlik qoǵamynyń negizgi aksıoneri bolǵan. Dinı ortalarda yqpaldy adam sanalady. Ol Islam dininiń Sáláfızm aǵymynyń beldi ókili degen beıresmı aqparat bar.