Shyǵys Qazaqstan oblysynda «AMANAT» partıasynyń atqarýshy hatshysy Asqat Oralov turǵyndarmen, zıaly qaýym ókilderimen, partıa belsendilerimen jáne jastarmen birqatar kezdesýler ótkizip, «Jańa Qazaqstandy» qurý mindetterine sáıkes joldaýdy iske asyrý jáne partıany jańǵyrtý máselelerin talqylady. Sonymen qatar, atqarýshy hatshy «Ardagerlerdi ardaqtaıyq!» jáne «Kedergisiz keleshek» partıalyq jobalary aıasynda ótken is-sharalarǵa qatysty.

Abaıdyń «Jıdebaı-Bórili» qoryq-murajaıynda partıanyń atqarýshy hatshysy Abaı aýdanynyń aqsaqaldarymen júzdesti.

«Memleket basshysy Qasym-Jomart Toqaev óziniń 16 naýryzdaǵy tarıhı joldaýynda úsh jańa oblys qurylatynyn aıtty. Abaı oblysynyń ortalyǵy Semeı qalasy bolady. Bul tarıhı ári ádiletti sheshim, eń aldymen, óńirdiń damýyna qýatty serpin berip, onyń turǵyndary úshin jańa múmkindikter jasaıdy», dedi Asqat Oralov.

Óz kezeginde aqyn, Qazaqstan jazýshylar odaǵynyń múshesi Tólegen Janǵalıev munyń Semeı turǵyndary kópten kútkenin sheshim bolǵanyn atap ótti.

«Biz prezıdenttiń joldaýyn muqıat tyńdadyq jáne ony tolyq qoldaımyz. Ásirese, Abaı oblysyn qurý jónindegi sheshimine aıryqsha qýandyq. Bul sheshim – memleket basshysynyń hákim Abaıǵa jáne Shyǵys jurtyna degen qurmetiniń belgisi. Osynda otyrǵan aqsaqaldar jaǵymdy jańalyqty estigen kúnniń erteńinde Memleket basshysyna alǵysyn aıtyp, telegramma joldady», dedi Tólegen Janǵalıev.

Semeı qalasynda zıaly qaýymmen kezdesýde tarıhı murany saqtaý, tarıhı-mádenı eskertkishterdi qalpyna keltirý jáne ónerdi damytý máseleleri talqylandy.

«Abaı oblysyn qurý – prezıdenttiń dana da, dara sheshimi boldy. Bizdiń oblys «Jańa Qazaqstandy» qurýǵa, sonyń ishinde rýhanı, mádenı, áleýmettik, ekonomıkalyq aspektilerge qomaqty úles qosatynyna senimdimiz», dedi fılologıa ǵylymdarynyń doktory, profesor Arap Espenbetov.

Sondaı-aq, atqarýshy hatshy Uly Otan soǵysynyń ardageri 100 jastaǵy Aleksandr Atavın, partıa ardagerleri Oralhan Sartaev pen Vladımır Halınniń úılerine arnaıy bardy. Asqat Oralov aǵa býyn ókilderine qamqorlyq jasaý maqsatynda 2014 jyldan bastap «Ardagerlerdi ardaqtaıyq!» partıalyq jobasy júzege asyp kele jatqanyn jetkizdi. Osy ýaqyt aralyǵynda el aýmaǵynda belsendi uzaq ómir súrýdiń 45 ortalyǵy ashyldy. Onda zeınet jasyndaǵy 60 myńnan astam adam bos ýaqytyn ótkizedi.

Budan soń «AMANAT» partıasynyń atqarýshy hatshysy «Gold King» sporttyq-saýyqtyrý kesheninde parasportshylarmen júzdesip, «Kedergisiz keleshek» partıalyq jobasy aıasynda erekshe qajettilikteri bar adamdardy qoldaý jáne qoljetimdi qalalyq orta qurý máselelerin talqylady.

Osy kúni Asqat Oralov Shyǵys Qazaqstan oblysynyń partıa aktıvimen kezdesip, «AMANAT» partıasyn jańǵyrtýdyń basymdyqtaryn talqylady.

Kezdesýde búginde óńirde 300-ge jýyq bastaýysh partıa uıymyna biriktirilgen 52 myńnan astam partıa múshesi bary aıtyldy. Barlyq deńgeıdegi máslıhattardyń 290 depýtatynyń 85,6%-y – «AMANAT» partıasynyń ókili. 104 aýyldyq okrýgte ótken saılaý qorytyndysy boıynsha «AMANAT» partıasynyń atynan qatysqan kandıdattardyń 82%-y jeńiske jetti. Jyl basynan beri Shyǵys Qazaqstan oblysy boıynsha partıanyń qoǵamdyq qabyldaý bólmelerine 2,5 myńnan astam ótinish kelip tústi. Negizinen adamdar áleýmettik qoldaý, jer telimderin bólý, turǵyn úı-kommýnaldyq sharýashylyq máseleleri boıynsha ótinish bildirdi. Naýryz aıynan bastap mobıldi qoǵamdyq qabyldaýlar shalǵaı aýyldarǵa barady.

Belsendi jastarmen kezdesý kezinde óskeleń urpaqty jergilikti jerlerde tolǵandyratyn negizgi máseleler talqylandy. Búginde Shyǵys Qazaqstan oblysyndaǵy jas depýtattar korpýsynda «AMANAT» partıasyna múshe 35 jasqa deıingi 43 otandasymyz bar.