Eki jyldan beri qoǵamdyq uıym retinde jumys istep kele jatqan "El men Jer" qozǵalysy saıası partıaǵa aınalmaq. Almatyda ótken baspasóz máslıhatynda qozǵalys jetekshisi, saıasatker Baltash Tursymbaev osyndaı málimdeme jasady. Yntaly top qatarynda rejıser Erkin Raqyshev te bar.

Saıasatker mundaı qadamǵa qoǵamdyq uıymnyń aımaqtardaǵy ókilderinen túsken túrli usynystar sebep bolǵanyn aıtady. Ol partıa tirkelip, aldaǵy parlament saılaýyna qatysyp jatsa, depýtattyq mandattyń 30-40 paıyzyn alatynyna senimdi ekenin jetkizdi. Sózinshe, qoǵamdyq uıym buǵan deıin eldiń damýy men jer máselelerin kótere júrip 60 myńdaı jaqtas jınaǵan. Endi 12 mıllıon elektorattyń aýdan, aýyldyq eldimekenderde turatyn 4 mıllıonynyń daýsyn alýǵa nıetti.

Baspasózge arnalǵan habarlamada partıanyń basty maqsaty – eldi tyǵyryqtan alyp shyǵyp, jarqyn bolashaqqa bastaıtyn baǵdarlamany júzege asyrý, ulttyq ıdeologıa negizin qalaý ekeni jazylǵan. Sondaı-aq partıa áleýmettik turmysy tómen jandardyń múddesin qorǵap, ádiletti qoǵam ornatý úshin kúresetini aıtylady.

Jıyn barysynda partıanyń baǵdarlamasy jasalyp qoıylǵanyn, aldaǵy ýaqytta taǵy tolyqtyrylyp, shyńdalyp, túzetile túsetini habarlandy.

Baltash Tursymbaev partıa baǵdarlamasy naqty 4 máselege taban tireıtinin málim etti.

1) Eldi damytý. Aýyldy qalpyna keltirý, damytý; aýyl sharýashylyǵy ónimderi óndirisin óristetý; kezinde jekemenshikke ótip ketken iri jer ıeleriniń menshigindegi jerdi halyqqa qaıtarý;

2) Jemqorlyqpen kúres. N.Nazarbaev áýleti men onyń aınalasyndaǵy 100 shaqty adam ıelenip otyrǵan ken oryndaryn memleketke qaıtarý;

3) Jańa konstıtýsıa qabyldaý. Oǵan 1993 jylǵy konstıtýsıany negiz etip alý, sol arqyly sýperprezıdenttik basqarý formasynan ketý;

4)  Ákimderdi saılaý. Halyq ishinen shyqqan, eldiń tynysyn, máselesin biletin, ózin saılaǵan halyqtyń aldynda jaýapkershilik alatyn adamdy jergilikti jerlerge basshy etip qoıý;

Saıasatker aldaǵy saılaý taza ótetinine senim bildiretinin, qoǵam óziniń talabymen bılikti saılaýdy ádil ótkizýge mindetteý kerek ekenin atap ótti.

Sondaı-aq ol "El men Jer" partıa qurǵysy kelip júrgen ózge de bastamashyl azamattardy qoldaıtynyn, Qazaqstanda kóp partıa bolýy kerektigin, bılikpen ymyraǵa kelmeıtinin aıtyp otyr.

Qazaqstanda tirkelgen 5 partıa bar. Olardyń úsheýiniń ókilderi parlamentte otyr. Táýelsiz sarapshylar resmı tirkelgen partıalardyń qatarynda balama pikir bildiretin, opozısıalyq kózqarastaǵy saıası toptardyń joǵyn jıi synaıdy. Opozısıalyq saıasatker Janbolat Mamaı men onyń jaqtastary eki jyldan beri ózderiniń "Demokratıalyq partıa" dep atalatyn saıası uıymyn tirkeı almaı júr. Jýyrda ádilet mınıstrligi tirkeýge qujat tapsyrýǵa kelgen opozısıalyq saıasatker Jasaral Qýanyshalın bastaǵan "Alǵa Qazaqstan" partıasynyń qujattaryn tolyq emes dep keri qaıtardy. Qańtar oqıǵasynan keıin birneshe saıasatker men qozǵalys partıa qurǵysy keletini týraly resmı málimdeme jasady. Olardyń qatarynda saıasatker "Baıtaq-Bolashaq" ekologıalyq alánsynyń jetekshisi Azamathan Ámirtaı (Baıtaq), eks-nurotandyq eks-depýtat Nurjan Áltaev (El tiregi), saıasattanýshy, eks-sheneýnik Sanjar Boqaev (Namys), qoǵam belsendisi Muhtar Taıjan (Jer qorǵany), jýrnalıs, qoǵam belsendisi Sáýle Ábildahanqyzy (Aq júnis áıelder partıasy) "Naǵyz Atajurt" uıymynyń ókilderi, saıasatker, bıznesmen Bolat Ábilov (Bizdiń tańdaý) bar. Ádilet mınıstrligi búginde "El tiregi", "Namys", "Baıtaq" jáne "Halyq derbestigi" (Jumataı Álıev) partıalary tirkelýdiń birinshi kezeńinen ótkenin habarlaǵan. Tipti Jumataı Álıevtiń partıasy 20 myń qol jınap, quryltaı ótkizip qoıǵan. Biraq bul jaıynda aqparat quraldary men áleýmettik jelide eshqandaı aqparat joq.