Úsh aıdan astam ýaqyttan beri qamaýda otyrǵan opozısıalyq saıasatker, tirkelmegen Demokratıalyq partıanyń jetekshisi Janbolat Mamaıǵa taǵy eki aıyp taǵyldy. Ol on jylǵa sottalýy múmkin. Bul týraly belsendiniń zaıyby jýrnalıs Inga Imanbaı málim etip, Janbolat Mamaı tergeý ızolátorynan jazǵan hat mátinin jarıalady.
Hatta saıasatker búgin ózine qylmystyq kodekstiń aýyr eki baby – 272-baptyń 1-tarmaǵy (jappaı tártipsizdikti uıymdastyrý) jáne 274-baptyń 4-tarmaǵy (kórineý jalǵan aqparat taratý) boıynsha aıyp taǵylǵanyn belgenin, ózin qańtar kúnderi jappaı tártipsizdikter uıymdastyryp, jalǵan ekeni belgili aqparat taratqany úshin aıyptap otyrǵanyn aıtady.
"Endi bıliktiń aqylǵa qonymsyz bul tirliginiń qandaı aqymaqtyq ekenin túsindirip ótsem. "Uıymdastyrdy" dep olar 4 qańtar kúngi "Almaty arena" mańyndaǵy alańdaǵy mıtıńti aıtyp otyr. Men sol alańda saıası reformalar júrgizýdi talap etip, jınalǵan jurtty Respýblıka alańyna barýǵa shyqyryppyn-mys. Bul aıyptary túkke de turmaıdy. Birinshiden, meniń "Almaty arena" mańyndaǵy alańda sóılegen sózimniń tolyq nusqasy bar. Onda men eshkimdi eshqaıda barýǵa shaqyrmaǵanym anyq estilip tur. Kerisinshe, báriniń sol jerde turyp, eshteńeni búldirmeı, polısıamen qaqtyǵysqa túspeýdi ótingenim jazylyp qalǵan. Bul beıne jazba áleýmettik jelilerde jarıalanǵan bolatyn. Onyń ústine, birer mınýttardan keıin meni jáne basqa da beıbit qarsylyq tanytyp turǵan biraz adamdy polısıa ustap áketken edi. Men eshkimdi alańǵa bastap aparǵam joq, óıtkeni ol kezde men ol jerde bolǵam joq. Ekinshiden, men jalǵyz ózim jappaı tártipsizdikterdi qalaı uıymdastyrady ekem? Maǵan baǵynǵan "top" qaıda? Olar kimder? "Uıymnyń" anyq ta dál eseptelgen jospary qaıda? Álde men jalǵyz ózim quqyq qorǵaýshy organdardyń myńdaǵan qyzmetkerlerin buzyp, jaryp, taptap óte shyǵatyn qazaqtyń "Rembosymyn" ba? "Ótirik ekeni belgili jalǵan aqparat" taratty dep, bular meniń Jańaózende 10 myń adam alańda tur degen sózimdi alyp otyr. Bul BAQ-ta jarıalanǵan ashyq ta naqty aqparat. Bolmasa, prokýratýra "ondaǵylardyń bárin sanap shyqtyq, alańda tek 9999 adam ǵana turdy" dep, meniń aıtqanymdy joqqa shyǵarǵysy kele me? Logıka qaıda? Prokýratýranyń logıkasyna salsaq, mundaı aıypty prezıdent Toqaevqa da taǵýǵa bolady emes pe? Óıtkeni, ol qańtar kúnderi tek bir Almatyǵa ǵana 20 myń terrorshy shabýyl jasady dep málimdegen bolatyn. Qaıda ol terrorshylar? Al, 5 maýsym kúni Toqaev eldiń aldynda 20 myń terrorshynyń bolmaǵanyn moıyndady. Endi, prokýratýra osy fakti boıynsha qylmystyq is qozǵaýy tıis qoı?" deıdi belsendi hatynda.
Ol ózine tańyp otyrǵan qylmystyq is oppozıasıadaǵy tulǵany qýdalaý úshin ashylǵan saıası astary bar is dep sanaıtynynyn jarıa túrde málimdeıtinin, bul – bıliktiń táýelsiz saıası kúshterden ólerdeı qorqatynyn kórsetedi málim etti.
"Meni Nazarbaev bıligi tusynda qýdalaýǵa ushyratyp, túrmege de qamaǵan. Sol úrdis Toqaev kezinde de jalǵasyp jatyr. Eger de, prezıdent Toqaev Nazarbaevtyń jolymen júre beremin dep oılasa, qatty qatelesedi. Bul jolda, dıktator Nazarbaev syndy, onyń da saıası ǵumyry sátsiz aıaqtalyp, kúıreıtinin eskertemin. Sońǵy referendýmda, resmı derekter boıynsha ǵana, 1,5 mln azamat Toqaevtyń usynystaryn qoldamaıtyndaryn bildirdi. Bul neni bildiredi? Bıliktiń súıkimi ketkenin bildirse kerek. Bılikke eldiń senimi joq ekenin bildirse kerek. Al, óz oponentterin saıası qýǵynǵa ushyratqany bılikke senim reıtıńin kótermesi anyq. Men tap kelgen qıyndyqtar men bıliktiń repressıasy aldynda basymdy ımekshi emespin. Kúresimdi jalǵastyra beremin jáne ózimniń shyndyǵymdy sońyna deıin dáleldep shyǵamyn" deıdi opozısıalyq saıasatker.
Janbolat Mamaı aqpan aıynan beri qamaýda otyr. Ol aldymen qańtar oqıǵasy qurbandaryna arnalǵan qaraly mıtıńti uıymdastyrǵany úshin 15 táýlikke, artynsha eki qylmystyq is boıynsha eki aıǵa qamaýǵa alynǵan. Oǵan "qarabet" degeni úshin quqyqqorǵaý organy qyzmetkerin qorlady, nesıe amnıstıasyna baılanysty "jalǵan aqparat" taratty degen aıyp taǵylyp otyr. Janbolat Mamaıdyń jaqtastary men adam quqyǵy salasyndaǵy bedeldi halyqaralyq Human Rights Watch jáne Amnesty International uıymdary belsendini qýdalaýdyń saıası astary bar ekenin aıtady.
Pikir qaldyrý