Petropavl qalasynyń eki turǵyny áleýmettik jelide Soltústik Qazaqstandy Reseıge qosýǵa usynys jasaǵany úshin 5 jylǵa bas bostandyǵynan aıyryldy, dep habarlady Sputnik Qazaqstan portaly.
Sotqa erli-zaıyptynyń zańsyz áreketine qatysty is túsken. Ekeýi Qylmystyq kodekstiń 180-baby (Separatıstik áreket), atap aıtqanda, Qazaqstan Respýblıkasynyń birtutastyǵy men tutastyǵyn, onyń aýmaǵyna qol suǵylmaýyn jáne bólinbeýin buzýdy ne memleketti ydyratýdy nasıhattaý nemese oǵan jarıa túrde shaqyrý, sol sıaqty osyndaı mazmundaǵy materıaldardy taratý maqsatynda daıyndaý, saqtaý nemese taratý boıynsha jaýapqa tartyldy.
Sot materıaldaryna sáıkes, olar "Chat Rýletka" qosymshasyna kirip, Soltústik Qazaqstan oblysyn Reseı Federasıasyna qosýǵa úndegen. Osy tanymal servıstiń negizinde beınebaılanys arqyly álem boıynsha kez kelgen jeli qoldanýshysymen sóılesýge bolady.
"Erli-zaıypty kinási is materıaldarymen rastalyp otyr. Ózderi kinásin moıyndaǵan joq. Degenmen zańsyz áreketi dáleldendi. Beınejazba da bar. Ol jerde qylmystyq tártip buzýshylyq tirkelgen. Keshendi psıhologıalyq-fılologıalyq saraptama jasaldy" dedi Soltústik Qazaqstan oblystyq sotynyń baspasóz qyzmeti.
Prokýror árbir sottalýshyny 5 jylǵa bas bostandyǵynan aıyrýdy suraǵan. Al erli-zaıypty kinásin moıyndamaı, ózderin aqtaýǵa ótinish jasady. Zań boıynsha ondaı tártip buzýshylyq ekstremıstik qylmystarǵa jatady. Ol úshin 5 jyldan 10 jylǵa deıin bas bostandyǵynan aıyrýy jazasy qarastyrylǵan.
Al Qylmystyq kodekstiń 63-baby, 6-bóligi boıynsha ekstremıstik qylmys jasaǵan adamǵa shartty jaza qoldanylmaıdy.
"Osyny eskere otyryp, sot sottalýshylarǵa mınımaldy jazany taǵaıyndap, árbireýin bes jylǵa bas bostandyǵynan aıyrýǵa sheshim shyǵardy. Olar óz jazasyn qaýipsizdigi ortasha mekemede óteıdi" delingen sot habarlamasynda.
Erli-zaıyptynyń jazasyn jeńildetetin jáne aýyrlatatyn mán-jaılar anyqtalǵan joq.
Pikir qaldyrý