Erte, erte, ertede, alǵash dúnıe jaratylǵan kezde barlyq Pir ataýly jer betinde jınalypty. Bular jándikterdi, balyq pen ulýdy, haıýanattardyń túr-túrin jaratypty. Eń sońynda Pirler keńese kele «Ózimizden aýmaıtyn Adamzat degen jaratylys ıesin jasaıyq» dep uıǵarypty.
Pirler dýyldasa otyryp, sazdy ılep, balshyqtan adamnyń birneshe beınesin jasap, ony keptirý úshin kún kózine qoıypty. Kenet jańbyr jaýady. Pirler ýlap-shýlap, saz músinderdiń aıaq-qoldaryn búktep, jáshikke salady. Saz músinder búlinip, qıqy-jıqy keıipke túsipti. Múgedek jandardyń dúnıege kelýi de dál osydan bastalǵan eken...
Adam balasy jaratylǵan soń, ony jelep-jebep júretin Pirdi anyqtar kezde Aspan Piri men Teńiz Piriniń arasynda talas týady.
- Jer betinde Adamdy órbitý kerek degen bastamany basqa emes, men kóterdim emes pe?! - deıdi Aspan Piri.
- Joq, sol Adamǵa tirshilik rýhyn - jandy salǵan basqa emes - Teńiz Piri!
Aspan Piri men Teńiz Piri osylaısha uzaq daýlasypty.
Sol kezde Aspan Piri qýraǵan eki aǵashty alyp kelip, mynandaı usynys aıtypty:
- Qanekı, myna qýraǵan aǵashtarǵa qaısymyz gúl bitirsek, sonymyz Adamnyń ıesi bolaıyq. Qýraǵan aǵashtardy jastyǵymyzdyń astyna jastap uıyqtaıyq. Tańerteń kimniń aǵashy gúldep tursa, sol Adamnyń ıesi de bolady.
Sóıtip, Aspan Piri men Teńiz Piri bir-bir aǵashtan basyna jastanyp uıqyǵa ketipti. Tún ortasynda Aspan Piri kózin ashyp qarasa, jastyǵynyń astyndaǵy qýraǵan aǵash sol qalypty, al Teńiz Piriniń jastyǵynyń túbinen ádemi gúl kórinedi. Aspan Piri asqan eptilikpen aǵashtardy almastyryp qoıady da, qaıtadan uıqyǵa ketedi.
Tań aǵaryp atqanda Aspan Piri kórpesin túrip, til qatty:
- Mine, meniń jastyǵymnyń túbindegi aǵash gúldep tur. Endi Adamnyń ıesi men bolamyn!
Sonda Teńiz Piri aýyr kúrsinip bylaı depti:
- Meniń jastyǵymnyń astyndaǵy aǵash qana gúldeýi kerek edi. Óıtkeni, mende ylǵal bar ǵoı. Sýsyz gúldegen aǵashty birinshi ret kórip turmyn... Demek, Adamzattyń ómiri de asa qaıshylyqty, túsiniksiz bolady. Endi bul dúnıede urylar men qaraqshylardyń san túri paıda bolady. Endi ádiletti adamdar emes, tek urylar men qaraqshylar ǵana baıtyn bolady. Adamzat bir-birin qyryp joıyp, tútip jep, birin-biri tonaıtyn bolady. Olar búldirýge, buzýǵa beıim turatyn bolady.
Ol osyny aıtty da Teńizine ketti. Sodan bastap Aspan Piri Adamǵa ıelik etetin bolypty. Teńiz Piriniń boljamy da aına- qatesiz júzege asyp keledi deıdi...
Japon tilinen aýdarǵan
Sharafat Jylqybaeva
