Almaty ákimi Erbolat Dosaev «Almaty Sý» komýnaldyq kásipornyn damytýdyń ózekti máseleleri boıynsha jumys keńesin ótkizdi, sondaı-aq tutynýshylarǵa qyzmet kórsetý ortalyǵy men ortalyq dıspecherlik qyzmettiń jumysymen tanysty.

Qala basshysy qysqa merzimde ınjenerlik jeliler men jabdyqtardyń tozý deńgeıin tómendetý qajettigine erekshe nazar aýdardy. Qaladaǵy negizgi magıstraldyq sý qubyrlary, kolektorlar, sý daıyndaý stansıalary jáne káriz tazartý qondyrǵylary 60-70 jyldary salynǵan. Máselen, búginde Almatyda sý qubyry jelileriniń tozýy 55,8%, káriz jelilerinki - 57,5%, qubyrlardyń bir bóliginiń tozý dárejesi 100%-dy quraıdy.

«Almaty Sý» MKK basshylyǵy qala ákimine qalalyq sý qubyry-káriz sharýashylyǵynyń aǵymdaǵy jaǵdaıy jáne jumystyń aralyq qorytyndylary týraly habardar etti, sondaı-aq jańǵyrtýǵa, tutynýshylardy sapaly qyzmettermen úzdiksiz qamtamasyz etýge, bıznes-prosesterdi jaqsartýǵa jáne óndiristi avtomattandyrýǵa basty nazar aýdarylǵan damý josparyn tanystyrdy.

Tozýdy azaıtý jáne apatty jaǵdaılardyń aldyn alý úshin jyl saıyn keminde 104 km sý qubyrlaryn, 73 km káriz jelilerin aýystyrý qajet, sondaı-aq dıametri 900 mm jáne odan joǵary iri sý qubyrlary men káriz kolektorlaryn qaıta jańartý kerek. Bul rette qoldanystaǵy ınvestısıalyq baǵdarlama jyl saıyn tek 20-24 km tozǵan qubyrlardy aýystyrýdy qamtamasyz etedi.

Munyń sebebi tómen/teńgerimsiz tarıf bolyp tabylady: eger búkil álemde jelilerdiń jaǵdaıyn retteýdi qoldaý jáne jóndeý qory tarıf belgileý jáne qyzmetterdi paıdalanýshylardan túsetin túsimder esebinen jabylsa, onda «Almaty Sý» MKK jaǵdaıynda negizgi ınvestor memleket bolyp tabylady (Almatydaǵy tarıf deńgeıi el boıynsha eń tómen deńgeıdiń biri jáne 8 jyldan astam ýaqyt boıy ózgermegen – 1 000 lıtrge 48 teńge).

Keńes barysynda sýmen jabdyqtaý jáne káriz júıesin jańǵyrtý máselesi talqylandy, iske asyrý merzimderi aıtyldy – qalalyq baǵdarlama aıasynda 2025 jylǵa deıin (40,9 mlrd teńge) negizgi magıstraldyq sý qubyrlary men káriz kolektorlaryn qaıta jańartýǵa basa nazar aýdarý qajettigi josparlanýda. Talǵar jer asty sý kózderinen sý jetkizý júıesin jańǵyrtý, Qarǵaly sý daıyndaý stansıasyn paıdalanýǵa berý kózdelgen.

2030 jylǵa deıin megapolıs turǵyndarynyń 95% - yn ortalyqtandyrylǵan sý burýmen qamtýǵa múmkindik beretin káriz-sorǵy stansıalarynyń jelisin bir mezgilde keńeıtip jáne jóndep, qala syrtyndaǵy kolektordy (14 km-den úsh jip) rekonstrýksıalaý, Batys kolektoryn salýǵa kirisý qarastyrylǵan. Sondaı-aq komýnaldyq obektilerdi rekonstrýksıalaý jáne tehnologıalyq jabdyqty aýystyrý jumystary jalǵastyrylatyn bolady.

Infraqurylymdy modernızasıalaýdan basqa, kásiporynnyń damý jospary sý shyǵynyn azaıtý maqsatynda kezeń-kezeńmen sıfrlandyrý jobasyn qamtıdy. Komýnaldyq qyzmetkerlerdiń málimetinshe, Almatyda jyl saıyn qalanyń ulǵaıýyna baılanysty sýdy tutyný ósýde (5 jylda 25 myń tekshe metr). Bul óz kezeginde tıisti ınfraqurylym men qyzmet kórsetýdi (8 jyl ishinde kásiporynnyń ınjenerlik jelileriniń uzyndyǵy 18,5%-ǵa ósti) qajet etedi.

Kezdesý qorytyndysy boıynsha qala ákimi «Almaty Sý» MKK basshylyǵyna qysqa merzimde ınjenerlik jelilerdiń tozýyn azaıtý jáne kórsetiletin qyzmetterdiń sapasyn arttyrý úshin jańa tarıftik saıasatty engizý jóninde usynystar berýdi tapsyrdy.

Megapolıs basshysy energetıka jáne komýnaldyq kásiporyn basqarmasynyń aldynda beriletin sýdyń shyǵynyn azaıtý, tutynýdy fıskalızasıalaý jáne ınfraqurylymdy jańǵyrtý jobalaryn iske asyrý, onyń ishinde Sıfrlyq sý arnasy jobasyn engizý mindeti turǵanyn atap ótti.

Almaty qalasy ákiminiń baspasóz qyzmeti