Búgin «AMANAT» partıasynda «Uly dala» respýblıkalyq shyǵarmashylyq baıqaýy qorytyndylandy. Bıyl ádebı konkýrs uly aǵartýshy, Ult ustazy Ahmet Baıtursynulynyń 150 jyldyǵyna jáne jazýshy Muhtar Áýezovtiń 125 jyldyǵyna arnaldy.

İs-sharany ashqan «AMANAT» partıasynyń tóraǵasy Erlan Qoshanov aldaǵy ýaqytta  jobanyń aıasyn keńeıtip, aýdandyq, oblystyq, sodan keıin respýblıkalyq deńgeıde ótkizýdi usyndy.

«Nebir týma talanttar aýyldarda júr. «Uly dala» baıqaýy sol talanttardyń túlep ushar uıasyna aınalýy tıis. Qazaq ádebıetiniń keleshegi tek shyǵarmashylyq qaýymdy ǵana emes, barshamyzdy alańdatady. Ádebıettiń bolashaǵy – ulttyń bolashaǵy. Sondyqtan, jańa dáýirde jańa esimder kerek. Tek olardy izdep-taýyp, qamqorlyq kórsetý qajet. Jastardy yntalandyryp, jolyn ashý úshin «AMANAT» partıasy osy baıqaýdy uıymdastyryp otyr», – dedi Erlan Qoshanov.

Aıta keteıik, 26 tamyz ben 10 qarasha aralyǵynda baıqaýǵa bas-aıaǵy 152 shyǵarma kelip tústi. Onyń barlyǵy aikyn.kz saıtynda arnaıy ashylǵan «Uly dala baıqaýy» aıdarynda búrkenshik esimmen jarıalanyp otyrdy.

«Tolqyndy tolqyn qýady. Keshegi aǵa býynnyń, búgingi orta býynnyń izin jalǵaıtyn talanttarymyz ádebıet aıdynynda az emes. Sondyqtan, daryndy jastardyń sýyrylyp alǵa shyǵýy – zańdylyq. Baıqaýdyń basty maqsaty – jas qalamgerlerdi yntalandyrý, qanattandyrý. Sondyqtan bul baıqaý aldaǵy ýaqytta da jalǵasyn tabady», – dedi Májilis depýtaty, qazylar alqasynyń tóraǵasy Amanjol Áltaı.

Sonymen, «Poezıa» nomınasıasy boıynsha birinshi oryndy aqyn Jánibek Álıman, ekinshi oryndy aqyn Shapaǵat Ábdiruly, úshinshi oryndy aqyn Tańsáýle Ágenqyzy ıelendi.

«Proza» nomınasıasynda birinshi orynǵa jazýshy Álıhan Jaqsylyq, ekinshi orynǵa jazýshy Ádil Áýezhanov, úshinshi orynǵa ustaz Aızat Raqysheva laıyqty dep tanyldy.

«Balalarǵa arnalǵan shyǵarma» nomınasıasy boıynsha birinshi oryndy Alpysbaı Ábdiluly, ekinshi oryndy aqyn Quralaı Omarova, úshinshi oryndy balalar jazýshysy Aısulý Álmash qanjyǵalady.

«Dramatýrgıa» nomınasıasynda birinshi oryndy dramatýrg Yqylas Shalǵynbaı, ekinshi oryndy jýrnalıs Aqlıma Saparova, úshinshi oryndy aqyn Toqtaráli Tańjaryq jeńip aldy.

Sonymen qatar, bıyl tuńǵysh ret taǵaıyndalǵan «Alash amanaty» arnaıy syılyǵyn alashtanýshy-zertteýshi, balalar jazýshysy Eldos Toqtarbaı, «Ahmet Baıtursynulynyń 150 jyldyǵyna arnalǵan» arnaıy syılyqty aqyn, jazýshy, kınosenarıst Ularbek Nurǵalymuly ıelendi. Al «Muhtar Áýezovtiń 125 jyldyǵyna arnalǵan» arnaıy syılyqty jazýshy Abaı Aımaǵambetov jeńip aldy.

«Kez kelgen baıqaý jarq etip jarıalanǵanda emes, dástúrge aınalǵan kezde oǵan avtorlar daıyndyqpen kelip, óz jemisin bere bastaıdy. Bıyl bul shyǵarmashylyq báıge Ahmet Baıtursynulynyń 150 jyldyǵyna arnalǵannan keıin avtorlarǵa onyń jaýapkershilik júgi jeńil bolmaǵany anyq. Ádebıet – tutas qoǵammen ushtasyp jatqan dúnıe. Sondyqtan ádebıetti qoldaý – tek rýhanıatty qoldaý emes, jalpy qoǵamnyń oń betburysyna áser etý degen sóz», – dedi Ularbek Nurǵalymuly.

Sondaı-aq, partıanyń Ortalyq apparatynda ótken is-sharada Qostanaı oblysynyń Torǵaı aýylyndaǵy «A.Baıtursynuly men M.Dýlatulynyń ádebı mýzeıiniń» qyzmetkerleri kórme uıymdastyrdy. Onda Ult ustazy tutynǵan zattar, qundy jádigerler, qaıratker shyǵarmalarynyń túpnusqasy jáne t.b zattar qoıyldy.

«AMANAT» partıasynyń baspasóz qyzmeti