Áleýmettik talaptan bastalyp, saıası sıpatqa aýysqan halyqtyń jappaı narazylyǵy arty búlikke aınalyp, resmı derekke saı 238 adamnyń ólimine soqtyrǵan Qańtar oqıǵasyna bir jyl. Bir jyl buryn dál osy 4 qańtarda jaǵdaı suıytylǵan gaz baǵasynyń arzandaýyn talap etken jańaózendikter saıası talaptar aıta bastap, ony aımaqtar da qoldap áketti.

2 qańtar. Jańaózendikter Mańǵystaý oblysynda "kógildir" otyn baǵasy kenetten 60 teńgeden 120 teńgege deıin óskenine beıbit túrde narazylyq bildirip, alańǵa shyqty. Quzyrly organ ókilderi ádettegideı azamattarǵa áreketi beıbit jıyn uıymdastyrý týraly zańǵa qaıshy ekenin aıtyp, olardy taratýǵa tyrysty. Ákimdik ókilderi jınalǵandarǵa óz talaptaryn jazbasha túrde baıandaýdy usynsa, Energetıka mınıstrli gaz baǵasy naryqta qalyptasqan jaǵdaıǵa jáne suranystyń kóbeıýine baılanysty qymbattaǵynyn, baǵa endi burynǵy deńgeıge qaıta kelmeıtinin jetkizip, óz ustanymynan qaıtpady.

3 qańtar. Alańǵa jınalǵandar raıynan qaıtpaı, alańǵa jurtshylyq jıyla berdi. Ystyq tamaq, sháı ákelip, talap tolyq oryndalmaıynsha taramaıtynyn naqty jetkizdi. Mańǵystaý oblysyndaǵy áleýmettik-ekonomıkalyq jaǵdaıdy qarastyrý úshin Úkimettik komısıa qurylyp, nátıjesinde bıznestiń áleýmettik jaýapkershiligi aıasynda gaz qunyn lıtrine 120 teńgeden 85-90 teńgege deıin tómendetý týraly sheshim qabyldandy. Halyq burynǵy baǵany talap etip turyp aldy. Sol aralyqta bılik Jańaózenge kirer joldardy bógep, kúzetti kúsheıtip, qala aýmaǵynda ınternet pen uıaly baılanys jumysyn shektedi. Mıtıńke shyqqandarǵa arandatýshylyq degen quqyqtyq baǵa bere berile bastady.

Al halyq tolqýy údeı túsip, jańaózendikterdi qoldaýǵa ózge óńirler qosyldy.

Almatyda dıssıdent, aqyn Aron Atabektiń qazasyna 40 kún tolýyna oraı berilgen astan shyǵyp, Jańaózen azamattaryn qoldamaq bolyp Navoı kóshesi boıymen sherýletken bir top adamdy polısıanyń arnaıy jasaǵy ustap áketti.

Sol kúni saıası belsendi Janbolat Mamaı men onyń jaqtastary Mańǵystaý oblysyndaǵy narazylyq aksıasyna qatysýshylardy qoldap, Almaty kóshelerine shyqty.

4 qańtar. Aqtaýda myńdaǵan adam alańǵa shyǵyp, halyq narazylyǵy saıaı reńk ala bastady. Jınalǵandar "Shal ket", "úkimet otstavkaǵa ketsin" dep urandata bastady. Facebook-te keı qoldanýshylar alańdaǵy adam sany 10 myńnan asyp ketkenin jazyp jatty.

Atyraýda Isataı men Mahambet ortalyq alańdaryna jınalǵan myńdaǵan azamat jańaózendikterge qoldaý bildirip, «Shal ket», «Baǵa arzandasyn!» degen talaptaryn jetkizdi. Polısıa men arnaıy jasaq joldy jaýyp tastaǵanymen, sherýshiler qorshaýdy buzyp ótti. Polısıa narazylyq bildirýshilerdiń birin ustaǵannan keıin narazy halyq pen polısıa arasynda qaqtyǵys boldy. Nátıjesinde avtozakty toqtatyp, ishindegi ustalǵan azamattardy bosatyp aldy.

Úkimettik komısıa Jańaózende jergilikti belsendilermen kelissóz júrgizip, aqyry halyq talabyny qulaq asty. Komısıa músheleri 4 qańtarda keshke qaraı Aqtaý qalasyndaǵy Yntymaq alańyna jınalǵan belsendilermen kezdesip ortaq sheshimdi jarıalady. Oǵan saı, "QazMunaıGaz"UK AQ áleýmettik jaýapkershiligi aıasynda Mańǵystaý oblysynda suıytylǵan gaz qunyn tómendetý jáne lıtrine 50 teńge baǵasyn belgileý týraly sheshim qabyldandy. Alańda bolǵan adamdardy jaýapkershilikke tartpaý týraly kepildik berildi.

Jańaózendikterdiń jeńisi el aýmaǵynyń basym bóligin sharpyǵan narazy kóńil-kúıdi seıilte almady.

Keshke qaraı Almatyda myńdaǵan azamat Mańǵystaý oblysyndaǵy halyq narazylyǵyna qoldaý retinde Almaty-Arena sport kesheni mańyna jınala bastady. Polısıa alańǵa jınalǵan biraz azamatty ustap áketti. Olardyń qatarynda belgili jýrnalıs Qasym Amanjol, tirkelmegen Demokratıalyq partıanyń jetekshisi Janbolat Mamaı bar bolatyn. Alaıda sport kesheni mańyna jınalǵan adam ústi-ústine kóbeıip, adam nópiri qala ákimdigine qaraı jol tartty.

Beıbit narazylyq búlikke ulasqan tus osy 4 qańtardan 5 qańtarǵa qaraǵan tún.