Maqsat Ábdiqadyruly shyǵys pen qazaq medısınasyn qatar ushtastyrǵan. Tamyr ustap, dıagnoz qoıýdy ǵylym deńgeıinde meńgergen. Ózi bul tásildi qazaq baǵzy zamannan bilgenin, qazaq medısınasynda ta­myr ustaýdyń toǵyz ádisi baryn, ata­la­rymyz tamyr ustaý ar­qyly túrine, óńine, kózine, ıisine qarap dıagnoz qoıa bilgenin aıtady. Ortalyqta dıagnoz anyqtaýda tamyr ustaýdan bólek, ÝZI apparattary men laboratorıalyq tekserýler qoldanylady. Ol úshin sáıkes qurylǵy, qondyrǵylar jetkilikti. Dári-dármek negizinen shópten jasalady.

Dáriger ınemen emdeý ádisiniń de tereń mamany. Emdik ınelerdi arnaıy Qytaı, Reseı, Ońtústik Koreıadan aldyrady. Inemen emdeý ádisin qoldanarda zamanaýı standarttar men halyqaralyq ádistemeden aýytqymaıdy. Aıtýynsha, Dúnıejúzilik densaýlyq saqtaý uıymy al­tyn ınemen aýrýdyń 46 túrin emdeýge ruhsat bergen. Kúndelikti ómirde solardyń jıyrmadan astam túri keń taralǵan kórinedi. Atap aıtqanda, júrek jumysynan álsireýi, uıqysyzdyq, strestik jaǵdaılar, as qorytý júıesiniń nasharlaýy, túrli gryjalar, bedeýlik pen bel­sizdik, ımýnıtettiń álsireýi, garmonaldyq aýyt­qýshylyq, asqazan, ishek jolynyń buzylýy syndy kóptegen keselderdi jeńýde ınemen emdeý ádisiniń paıdasy mol.

Ǵalym medısına salasyndaǵy tájirıbesi men bilimi negizinde shóp dárilerdi paıdalaný men ıne salýdyń paıdasy týraly 2015 jyly jaryqqa shyqqan "Qazaq medısınasy" kitabynda egjeı-tegjeıli túsindirgen.

Maqsat Ábdiqadyruly dısertasıalyq jumysynyń nysanasy etip alǵan serebraldy sal aýrýyna shaldyqqan talaı búldirshinniń aıaqqa turyp ketýine járdemdesken.

Dáriger DSP-men aýyratyn balalardyń 70-80 paıyzynyń ata-anasy sıtomegalovırýs ınfeksıasyna shaldyqqanyn aıtady. Sondyqtan jas ata-analarǵa úılengennen keıin mindetti túrde dárigerge qaralyp baryp perzentti bolýǵa nıettenýge keńes beredi.

Maqsat Ábdiqadyruly Qazaqstannan bólek, Qytaıda da kásibı túrde moıyndalǵan. Qytaı Halyq Respýblıkasy ınemen emdeý qoǵamynyń múshesi. Qytaı, aǵylshyn tilderine jetik. Jumysyn sol jaqta jalǵastyrsa, úlken qyzmet te, qyrýar qarjy da tabylar edi. Alaıda ol atamekenim dep, bala-shaǵam sol el­ge sińip ketpesin dep keldi. Sodan beri mine, 10 jyldan astam ýaqyt sapaly qoǵam qurý jolynda qyzmet etip keledi.