Qazaq handyǵynyń 550 jyldyǵynyń Sırıadaǵy soǵysqa ne qatysy bar? Bylaı qaraǵanda túk qatysy joq. Biraq bizdiń ulttyǵymyzdy ulyqtaýǵa arnalǵan, jyl boıy kútken sharaǵa aıdalada jatqan Sırıanyń qatysy bar ma dep qalamyn. Eger sol soǵys bolmaǵanda bul sharaǵa Pýtın kelip qatysar ma edi? Jeńistiń jetpis jyldyǵyn toılanatynyn bilgen sátte-aq, handyqtyń toıy onyń qasynda jetim qyzdyń toıyndaı óter me eken dep kúdiktenip edik. Dál solaı boldy. Nege bizdiń handyqtyń bes jarym ǵasyrlyq mereıili kúnimen quttyqtap san taraptan aǵylyp hattar kelmedi? Óziniń ýaqyty joq bolsa da, qos betke shyǵaryp basýǵa arnalǵan habarlamany kórshi elder joldaýyna bolatyn edi ǵoı. Bul týraly «Qamshy» portaly habarlaıdy. Anyǵynda aıý kóshiniń memleketsiz ult bolǵansyńdar degen aıbatyna qarsy jaýap retinde 550 jyldyqty toılamaqqa sheshim shyǵyp edi. Biraq bunymyzǵa sóz shyǵarǵan adam «pysqyryp» ta pikir bildirmedi me, qalaı ózi? Áıtpese, ár qazaqqa óz shejiresi málim, tarıhy aıqyn ǵoı. Sırıadaǵy soǵyspen basy qatyp, AQSH-tyń daıyndaǵan saıası senarıleriniń mánin ashýdan qoly tımeı jatqan kórshige ókpelemeı-aq qoıaıyn. Týra shekarasynyń túbinde at shaptyryp, aq tý kóterip jatqanymyzdy qalpaqty qyrǵyz baıqamaı qalaı tynysh jata berdi? Qazaq handyǵy tusyndaǵy aıbynyn eske túsirgen qazaq Tashkent týraly sóz qozǵap qoıa ma dep ózbektiń kóshbasshysy da quttyqtaý joldaýdan ımense kerek. Bir qaraǵanda meniń myna kúıim, toı bitken soń alyp kelgen syılyǵyna kóńili tolmaı aǵaıynyna renjip otyrǵan kádýilgi aýyldaǵy jeńgelerdiń jaıyn eske túsiredi, bilemin. Biraq saıası sahnada ózindik ımıjin qalyptastyrǵan bizdiń Elbasyn Qazaq handyǵynyń 550 jyldyǵymen quttyqtaýlaryna bolatyn edi ǵoı. Handyqqa qatysty mundaı ıgilikti sharany endi qashan ótkizer ekenbiz? Astana kúnin atap ótkende aǵylyp keletin dos-kórshilerimiz Qazaq handyǵynyń 550 jyldyǵyn ótkizgende nege bizdiń kóshbasshynyń qasynan tabylmady? Álde álemge áınekterden salynǵan sońǵy úlgidegi ǵımarattarmyzdy ǵana kórsetip, Taraz jaqtaǵy jaıymyzdy málimdeýge bolmaı ma? Árıne aýyzdy qý shóppen súrtýge de bolmas. Bizdiń kóshbasshymyzdy Astanaǵa resmı saparmen kelgen Ýkraına Prezıdenti quttyqtady.
“Qurmetti Nursultan Ábishuly! Bizdiń memlekettik saparymyzdy qabyl alyp, zor qoshemetpen qarsy alǵandaryńyz úshin sheksiz rızashylyǵymdy bildiremin. Bul saparymyz Qazaqstanda ótip jatqan erekshe oqıǵamen tuspa-tus kelip otyrǵanyna qýanyshtymyn. Ol – Qazaq handyǵynyń 550 jyldyǵy. Atalǵan sharany teledıdar arqyly kórip, tánti boldyq. Keshe Tarazdaǵy osynaý merekege qatysyp, búgin bizben kezdesip, ekijaqty máselelerdi talqylaýda belsendilik tanytyp otyrǵanyńyz úshin alǵysym sheksiz. Muny Sizdiń ýkraın halqy men onyń úkimetine bildirgen senimińiz ben rıasyz qurmetińiz dep bilemin. Men Sizdiń BUU-da jasaǵan baıandamańyzdy tolyq tyńdap shyqtym jáne ol maǵan jaǵymdy áser qaldyrdy. Óıtkeni, Siz minberde turyp, qazirgi Ýkraına problemasyn sheshý máselesin kóterdińiz. Al, baıandamany bastan-aıaq qazaq tilinde jasaýyńyz halqyńyzǵa zor kúsh-jiger syılady degen senimdemin”, – dedi Ýkraına prezıdenti Petr Poroshenko. Ázrige osy quttyqtaýǵa kóńil jubatýǵa týra kelip tur. Álde Qazaq handyǵynyń 550 jyldyǵyn joǵary deńgeıde uıymdastyrmaǵanymyzdy ishimiz sezip, artyq qonaq shaqyrmaı, ózimiz bolyp qana atap óte saldyq pa?
Aınur Tóleý
