«AMANAT» partıasynyń Hatshysy Dáýlet Káribek dombyra – ulttyq mádenıetimizdiń, rýhanıatymyz ben ónerimizdiń altyn qazynasy ekenin atap ótti.

«Qazaq bar jerde – qasıetti dombyra, dombyra bar jerde – uly qazaq halqy bar. On toǵyz perne, qý shanaqta halqymyzdyń jany, muńy, zary, qýanyshy men jubanyshy, tarıhy men tanymy syıyp tur. Onyń eki isheginde eki álemniń áýeni, eki dúnıeni terbeıtin qýat bar. Rýhymyzdy bıiktetetin, aıbynymyzdy asqaqtatatyn ulttyq aspabymyz – qasterli qazynamyz», – dedi D.Káribek. 

Sóz sońynda partıa Hatshysy «Altyn dombyra» ortalyǵynyń shákirtterine qoldaý kórsetip, alǵys hat pen qarjy sertıfıkatyn tabys etti.

«Jastar Rýhy» jastar qanatynyń tóraǵasy Nurjan Jetpisbaev ulttyq dombyrany ulyqtaý is-sharalary elordamen shektelmeı, oǵan el aýmaǵynda bas-aıaǵy 4 000-ǵa jýyq adam ún qosyp jatqanyn jetkizdi.

«Biz babadan mıras bolyp qalǵan qasterli dombyranyń máni men mańyzyn, tarıhyn jas urpaqtyń boıyna sińirýdi kózdep otyrmyz. Dombyra – ultymyzdyń júrek úni, kóńil syry. Halyqtyń rýhyn kóterip, ortaq Otanymyzǵa degen mahabbatyn jańǵyrtsaq deımiz. El men jerge degen, mádenıet pen dástúrge degen súıispenshilik osyndaı is-sharalarda qalyptasady», – dedi ol.

Astana qalasynyń ákiminiń orynbasary Eset Baıken qara dombyra halqymyzdyń bolmysymen egiz, minezimen úndes aspap ekenin alǵa tartty.

«Bıyl elordada 17 myń balaqaı birinshi synyptyń tabaldyryǵyn attaıdy. Onyń 9 myńnan astamy qazaq synyptarynda bilim alýǵa nıetti. Olardyń 6 myńnan astamy qosymsha sabaq retinde dombyra pánin tańdady. Jas urpaqtyń ulttyq aspapqa degen qyzyǵýshylyǵynyń bir kórinisi – osy», – dedi E. Baıken.

İs-shara barysynda «Altyn dombyra» ortalyǵynyń shákirtteri bir emes, birneshe kúıdi oryndap, kóziqaraqty kórermenniń rızashylyǵyna bólendi. Sondaı-aq, kórermender arasynda vıktorınalar oınatylyp, qyzyqty suraqtar qoıyldy.