Jyl saıyn «Jasyl el» sarbazdary qatarynda jumys isteýge qyzyǵýshylyq tanytqan jastardyń sany artýda. Bul týraly elordalyq komýnıkasıalar qyzmeti alańynda Astana qalasy Jastar saıasaty máseleleri basqarmasynyń basshysy Qaırat Qambarov «Jasyl el» baǵdarlamasy aıasynda jastardy jumyspen qamtý» atty taqyryptaǵy brıfıńte aıtty.

Memleket basshysy Qasym-Jomart Toqaev jastardyń ekologıalyq sharalarǵa qatysýyna árdaıym mán berýde. Mysaly, Lıneınyı saıabaǵynda «Jasyl Astana» aksıasy aıasynda 30-ǵa jýyq belsendimen aǵash otyrǵyzý is-sharasyna Prezıdent qatysyp, jastarǵa óz tilegin jetkizdi.

Jasóspirimderdi de jumyspen qamtýdyń bir tetigi retinde jyl saıyn «Jasyl el» memlekettik baǵdarlamasy júzege asyrylady. Baǵdarlama – jastar men balalardy ekologıa mádenıetine, tabıǵatty aıalaýǵa jáne eńbekke baýlýǵa arnalǵan ıgilikti bastama. 2005 jyldan bastap qolǵa alynǵan bul jobanyń bıyl XIX maýsymy bastaldy. Oǵan 14-ten 35 jasqa deıingi mektep oqýshylary, stýdentter jáne jumyssyz jastar qatysa alady.

«Jasyl el» sarbazdary qalamyz­dyń qurylys nysanynda ártúrli sanattaǵy sheberlerdiń (qurylys ınjeneri, tehnolog, montaj-qurylys jumystarynyń sheberi) kómekshisi qyzmetin, qala mańyndaǵy «jasyl beldeýde» aǵash otyrǵyzý, taldar men kóshetterdi qopsytý jáne ­sýarý, aǵashtar men kóshetterge kútim jasaý jumysy arqyly tabıǵat pen qala kelbeti úndestik tapqan biregeı ekojúıeniń qalyptasýyna jáne qala saıabaqtary jasyl jeleginiń kútimimen aınalysyp, tazalyq jumysyn júrgizedi.

Jazǵy eńbek maýsymynda jastardy jumyspen qamtýǵa «Bazıs-A» qurylys kompanıasy, «Astana ­kógaldandyrý qurylysy» AQ, «Astana ormany» JSHS, 100-den astam bilim berý mekemesi, 20-ǵa jýyq kolej jáne 10-nan astam joǵary oqý orny seriktes bolýǵa kelisim berdi. Byltyr, naqty aıtqanda, 4208 jas jumyspen qamtylsa, bıyl da 4200 jasóspirim men jasty qamtý kózdelgen. Olardyń qatarynda kópbalaly otbasylardyń, áleýmettik jaǵynan az qamtylǵan otbasylardyń balalary, sonymen qatar, ata-anasynyń qamqorlyǵynsyz qalǵan balalar da bar. Jobaǵa qatysatyn jastardyń barlyǵy arnaıy ekıpırovkamen qamtamasyz etiledi.

Qazirgi tańda mektep oqýshylary óz mektepteriniń aýlasyn tazartý jumysyn bastap ketti. 14-17 jas aralyǵyndaǵy jastar kámelettik jasqa tolmaǵandyqtan, Eńbek kodeksine sáıkes, densaýlyǵyna zıan tıgizbeıtin, aýyr emes, kúnine 4 saǵattan artyq emes jumysqa jumyldyrylady. Al jumyssyz jastar qurylys kompanıalaryna ornalasyp, jumys ornynan jalaqy alý múmkindigine ıe. Sonymen qatar, «Jasyl el» jobasy aıasynda qosymsha 65 myń teńge kóleminde syıaqy taǵaıyndalady. Jumys ýaqyty – 8 saǵat. Osy shilde aıynda 1788 jas jumyspen qamtylady.