RF halqynyń 80 paıyzy memlekette ekonomıkalyq daǵdarys oryn alǵanyna senimdi bolsa, onyń jaqyn arada sońyn tabatynyna kúmánmen qaraıdy. «Qamshy» portaly «Levada-Sentr» ortalyǵyna silteme jasaı otyryp, júrgizgen saýalnama nátıjesin berýdi uıǵaryp otyr.

Respondentterdiń 23 paıyzy Reseıdegi daǵdarys bir-bir jarym jyl shamasynda jalǵasady dep oılaıdy, 24 paıyzy kem degende eki jyldy quraıtynyna senimdi, al kelesi 23 paıyz «daǵdarystyń merzimi óte uzaq bolady, saldary birneshe jylǵa deıin jalǵasady» dep otyr.

Bar bolǵany 5 paıyz adam ǵana Reseıdegi daǵdarys birneshe aıǵa, ári ketse jarty jylǵa sozylady dep senedi. Suralǵan halyqtyń 16 paıyzy qazirgi ýaqytta daǵdarys uzaqtyǵynyń qansha ýaqytqa sozylatyndyǵyn aıtýǵa qınalatyn kórinedi. Qalǵany saýalnamaǵa jaýap berýden bas tartqan.

Aıta keteıik, RF Ekonomıkalyq damý mınıstrliginiń habarlaýynsha, jalpy ishki ónimniń ekinshi toqsanda 4,4 paıyzǵa tómendese, birinshi toqsandaǵy tómendeýi 2,2 paıyzdy quraǵan. Batystyń ekonomıkalyq shekteýleri Reseıge áser etetini jaıly, amerıkandyq sanksıalardyń kesirinen reseılik olıgarhtardyń aktıvterdi qaıta quryp jatqany týraly  «Financial Times» gazeti jazǵan bolatyn. Mundaı qadamǵa barý olıgarhtardy jahandyq naryqtardan múlde alystatyp jiberýi múmkin. Sonymen qatar, basylym redaksıasynyń aıtýy boıynsha, bul degenimiz AQSH-tyń sanksıalardy uzartýǵa dámeli ekeniniń bir kórinisi eken.

Al, reseılik prezıdent «jaqsy sóz – jarym yrys» dep sanaıtyn kórinedi. Onysyn búgin ótken «Reseı shaqyrady» kezekti ekonomıkalyq forýmynda sóılegen sózinen ańǵarý qıynǵa soqpady: «Ótken jyly ekonomıkamyz quldyraǵan bolatyn. Bıyl da sol proses oryn alýy múmkin. Degenmen, aldaǵy jyldarda biz qazirgi jaǵdaıdy eńseretinimizge senemin!», - dedi ol.

Nazgúl Nazar