Germanıanyń Drezden qalasynda myńdaǵan adamnyń basyn quraǵan «PEGIDA» antııslamıstik qozǵalysynyń jańa aksıasy ótti. Bul týraly «Qamshy» portaly «Sächsische Zeitung» aımaqtyq gazetine silteme jasaı otyryp habarlaıdy. «Eýropa patrıottary Batystyń ıslamızasıalanýyna qarsy» degen uranmen shyqqandar bosqyndardyń el tabaldyryǵyn attaýyna múmkindik jasap jatqan  Angela Merkeldiń úkimetine qarsylyq bildirdi.

Belsendiler qaýymy «Jappaı qýý kerek!», «Halyq qalaýy», «Merkel ketýi tıis» degen qysqa mátindi plakattar ustap, Drezden kóshelerin keshkisin túgelimen aralap shyqqan. Plakattardyń birinde kansler hanym «Tereza Ana» retinde beınelenip, sýrettiń astynda «Terroreza Ana» dep jazylǵan eken.

Sonymen qatar, kóterilisshiler «Merkel anaǵa» jáne «Gabrıel-ońbaǵanǵa» (vıse-kansler Zıgmar Gabrıeldiń aty qate jazylǵan) dep jazylǵan arnaıy plakaty bar, qoldan jasalǵan dar daıyndaǵan eken.

«PEGIDA» qozǵalysynyń narazylyq kórsetýi Drezdende osydan bir jyl buryn bastalyp, qysqa qaraı toqtaǵan bolatyn. Sırıadan kelgen bosqyndardyń Germanıaǵa kelýi «Eýropalyq patrıottardy» kezekti aksıalar ótkizýine shabyttandyryp jibergen kórinedi. Atalmysh aksıalar Germanıanyń shyǵysynda ornalasqan birneshe qalalarda, sáıkesinshe Túrıngıa jáne Saksonıa jerlerinde de ótken bolatyn. Qozǵalys músheleri mıgrasıalyq saıasattyń kúsheıtilýin, bosqyn statýsynyń saıası qýǵynnyń qurbandaryna ǵana berilýin talap etip otyr.

Eýropada ıslam dininiń qanat jaıýyna qarsy bolǵan nemis halqynyń, bálkim, bulaı alańdaýshylyq bildirýi de oryndy shyǵar, kim biledi?! Sebebi, qazirgi ýaqytta Eýropa memleketteriniń ishindegi eń tynysh el – Germanıaǵa halyqaralyq terorızmniń ortasyna aınalý qaýpi tónip otyr. Bul týraly «Funke» medıatobynyń gazetinde jarıalanǵan suhbatynda Germanıa İshki ister mınıstri Tomas de Mezer bylaı dep málimdeme jasaǵan bolatyn: «Germanıa úkimetine kún saıyn Qıyr Shyǵystan kelip jatqan myńdaǵan bosqyndardyń arasynda ıslamdyq radıkaldardyń bolýy múmkin degen túrli málimetter kelip jatyr».

Onyń aıtýynsha, ázirge bul málimetter rastalmaǵan. Sebebi, kúni búginge deıin Germanıada terrorlyq áreketter oryn alyp jatqan joq. «Degenmen, máseleniń basqasha keıip almaýyna kim kepil?», - degen mınıstr, eldegi jaǵdaıǵa obektıvti pikir bildirip otyr.

Sonymen qatar, Mezer Germanıadaǵy bosqyndarǵa halyqtyń tarapynan kórsetilip jatqan zorlyq-zombylyqqa qatysty alańdaýshylyq bildiretinin jasyrmady: «Bıylǵy jyldyń ózinde bosqyn statýsyn surap keletinderdiń ýaqytsha panalaıtyn ornyna 490 shabýyldyń jasalǵany jaıly málimet bar. Ótken jylǵy kórsetkish – 200-ge jýyq bolatyn».

Aıta keteıik, halyqaralyq uıymdardyń málimetteri boıynsha, bıyl Eýropaǵa kelgen bosqyndar men mıgranttardyń sany jarty mıllıonnan asqan. Bul 2014 jylǵa qaraǵanda eki ese úlken kórsetkish.

Nazgúl Nazar