«28-29 qyrkúıek kúnderi memleket basshysy Qasym-Jomart Toqaev Germanıa Federatıvtik Respýblıkasyna resmı saparmen barady», degen aqparat jetti Aqorda jaqtan.

Berlınde Toqaev federaldyq kansler Olaf Sholspen jáne federaldyq prezıdent Frank-Valter Shtaınmaıermen kelissóz júrgizbek.

Eń qyzyǵy, dál sol kúnderi dál sol Berlınde Ortalyq Azıa jáne Germanıa memleketteri basshylarynyń kezdesýi josparlanǵan eken. Oǵan Qazaqstan prezıdenti de shaqyrylypty.

Aıta ketsek, osy aptada ǵana Ortalyq Azıa elderiniń basshylary Nú-Iorkte AQSH prezıdenti Baıdenmen kezdesken edi.

Keshegi Nú-Iorktegi jıynnyń da, erteńgi Berlındegi bul kezdesýdiń de bir uly jospardyń pushpaǵy ekenin ańǵarý qıyn emes.

Qyzyq bolǵanda, taıaý jyldary qazaqtyń baǵy ashylýy bek múmkin. Eki ǵasyrlyq ezgiden qutylamyz.

Bylaısha aıtqanda, Vashıngton men Brússel birigip, Ortalyq Azıa elderi men Qazaqstan úshin arnaıy baǵdarlama oılastyrǵan syńaıly. Ol árıne, saıası jáne ekonomıkalyq baǵdarlama, onyń jalǵyz maqsaty – OA elderi men Qazaqstannyń Reseıdiń eki ǵasyrlyq ımperıalyq qursaýynan qutylýǵa kómek berý. Barynsha qaýipsiz qylyp. Reseıden shyn qutylý úshin barlyq tarap jumylyp, birlesýi kerek. Tek solaı.

Baltyq elderi birlesken qımyldarynyń arqasynda ǵana Reseıdiń qushaǵynan kóp shyǵynsyz sytylyp ketken.

Al Ýkraınanyń Reseımen óz betinshe qoshtaspaq nıeti mıllıondaǵan ýkraındyqtardyń tragedıasyna ákeldi. Reseı Ýkraınanyń júzdegen eldi mekenin turǵyndarymen qosa aıaýsyz qyryp tastady.

Aıtpaqshy, Reseı Ázerbaıjandy paıdalanyp, Armenıany da qandy jolmen ýysynda ustaýǵa tyrysýda.

OA elderi men Qazaqstannyń Reseıdiń yqpalynan qutylýy – ýaqyt enshisindegi másele ǵana.

Reseıdiń «dostyq qolyn» jalǵyz óziń qaıtarýǵa barǵanyń – Ýkraınadaǵydaı tragedıamen tynady. Sondaı tragedıaǵa jol bermeý úshin AQSH pen Eýroodaq OA elderi men Qazaqstanǵa kómegin berip, qaýipsizdigin qamtamasyz etýge daıyn otyrǵan sıaqty.