Almatynyń qaq ortasynda Tımırázevtiń atymen atalatyn úlken kóshe bar. Biraq bul Tımırázovty birimiz bilsek, birimizdiń bilmeıtinimiz ras. Dardaı kóshemizge kezinde Tımırázev degenniń esimi berilgen eken. Al qazaq tarıhyndaǵy sansyz uly tulǵalardy aıtpaǵanda, Táýelsizdiktiń qos tarlany Altynbek Sársenbaev pen pen Zamanbek Nurqadilovtiń atyna áli bir kóshe buıyrmady. Qastandyqpen qaza tapqan qazaqtyń birtýar uldaryna kóshe buıyrý laıyq bolmaǵany ma?

Ol azdaı elimizde Klıment Tımırázevke tek kóshe ǵana emes, SQO-daǵy Qyzyljarda bildeı bir aýdannyń aty berilgen. Byltyr ol aýdanǵa jazýshy Sábıt Muqanovtyń atyn berý máselesi turǵyndar arasynda daýysqa salynǵan. 6163 adamnyń 95 paıyzy Sábıt Muqanovqa daýys berse, 5 paıyzy Tımırázevke daýys bergen. Biraq sonda da aýdannyń aty Tımırázevtiń atynda qalǵan.

Áı, Tımırázev degen kim edi sonsha, degen suraqqa kelsek:

Birinshiden, ol Reseıden shyqqan jaratylystaný salasynda jańalyq ashqan alǵashqy ǵalym eken.

Iá, ǵalym delik. Biraq ol Qazaqstanǵa, qazaqqa qandaı eńbek etti?

Meıli, ǵylym salasynda jańalyq ashqany úshin maqtap, madaqtaýǵa bolar. Biraq qazaq eli úshin, ultymyz úshin kúresip, eńbek etken ózimizdiń de uly tulǵalarymyz tolyp turǵanda, qazaqqa túk qatysy joq, tipti ómirinde qazaq ultyn qulaǵy estimeı ketken, aıaǵy jerimizge tımegen sheteldik ǵalymnyń atyna Almatynyń úlken kóshesinen nege at beriledi?

Bul máselege qatysty saıasatker, jýrnalıs Marat Baıdildauly bylaı dedi:

– Tımırázev degen orys ǵalymynyń qazaqqa túk te qatysy joq. Sonaý 30-40 jyldarda nebir aýylsharýashylyq mamandary ony oqysa, oqyǵan shyǵar. Biraq Táýelsiz Qazaqstanǵa atyn beretindeı eńbegi joq. Sondyqtan ol kósheniń atyn qazaqylandyrý qajet dep esepteımin. Tek ol ǵana emes, Tımırázev sekildi tolyp jatqan kóshelerdiń barlyǵynyń atyn qazaqshalaý kerek. Negizinde Táýelsizdik alǵannan keıingi otarsyzdandyrý (dekolınızasıa), sovetsizdendirý (desovetızasıa) qubylysy júrýi kerek edi. Osyndaı qubylystardyń oryn almaýynyń saldarynan áli kúnge deıin keshegi otarlaýshy júıeniń yqpalymenen ómir súrip kelemiz. Bul Táýelsiz Qazaqstan úshin uıat, azat Qazaqstan úshin abyroısyz áreket. Bulardyń barlyǵyn toqtatyp, jónge salý kerek dep esepteımin, – deıdi saıasatker.