Banktiń sholýynda muǵalimderdiń jalaqysy birqatar ósimderden keıin naryqtyq básekege qabiletti deńgeıge (mektepke deıingi bilim berýdi qospaǵanda) jaqyndap kele jatqany atap ótilgen. Biraq respýblıkadaǵy ortasha oqýshy men muǵalimniń araqatynasy (jalpy orta bilim berý uıymdarynda bir muǵalimge 9,5 oqýshydan) Ekonomıkalyq yqtymaqtastyq pen damý uıymynyń ortasha kórsetkishimen salystyrǵanda tómen.                       

«El boıynsha shaǵyn mektepterdiń 40%-da oqýshy men muǵalimniń araqatynasy 4,4-ke deıin tómen bolýy múmkin, al keıbir mektepterde muǵalimderdiń sany oqýshylardan da kóp bolýy múmkin. Bul kórsetkish ásirese aýyl mektepterinde kóp. Muǵalimderdiń resmı júktemesi qısynsyz jáne júıeni tıimsiz etedi. Sonymen qatar, myqty stýdentter arasynda oqý úlgerimin arttyrýdy yntalandyratyn muǵalimderge eńbekaqy tóleý júıesi («stavkalar») jáne jalaqyny esepteý, birkelki damytý turǵysynan kásiptiń tıimdiligin odan ári tómendetedi», – deıdi Dúnıejúzilik bank sarapshylary.

Júıe oqytýǵa jáne stýdenttermen jeke jumys jasaýǵa sapaly materıaldardy daıyndaýdan góri «saǵatqa» kóbirek ýaqyt bólýdi yntalandyrady. Buǵan qosa, oqýshynyń bar bilimin asyra baǵalap, kórsetkish úshin joǵary baǵa qoıýǵa septigin tıgizýi múmkin.  

«Eńbekaqy tóleý júıesi ózgertilmese jáne jumys júktemesi ońtaılandyrylmaıynsha, jalaqynyń ósýi muǵalimderdiń tıimdiligine áser etýi nemese onyń jumysynyń jaqsarýyna ákelýi ekitalaı», – dep qorytyndylady Dúnıejúzilik bank.

Jalpy, muǵalimderdiń jumysy men búgingi pedagogıkalyq bilimniń jaı-kúıi alańdatady. Mektep ustazdarynyń ál-aýqatyn jaqsartamyz dep jalaqyny kóbeıtti, teris tusy sol balǵa úımelegen aradaı túlekterdiń bári «ólmeıtin mamandyq» dep jappaı pedagogıka salasyna oqýǵa túsip jatyr. İlinip-salynyp júrip, ýnıversıtetti áreń bitirgender búginde bir-bir oqý ordasynda sabaq berip júr. Sondaǵysy, balalarymyzdyń qanshalyq sapaly bilim, ne tálim alyp jatqanyn kim bilsin?!