Málimetterge qaraǵanda, Karımova 2001 jyldan bastap 2013 jylǵa deıin «Ofıs» dep atalatyn qylmystyq uıymǵa jetekshilik etken, onyń quramyna birneshe ondaǵan adam kirgen. Uıym qorqytý-úrkitý, zorlyq jasaý arqyly qylmystyq qyzmet atqarǵan.

Gúlnara Karımovaǵa «Ofıs» dep atalatyn qylmystyq uıymnyń bas dırektory boldy dep aıyptap otyr. Ol osy uıymdy qurýǵa jáne qylmystyq qyzmetin bastaýǵa qatysqan, Shveısarıada Ofıs kompanıasy men onyń músheleri atynan bank esepterin ashqan, qylmystyq jolmen túsken aktıvterdi sonda aýdaryp otyrǵan, qarjy operasıalaryn negizdeý úshin jalǵan qujat daıyndaǵan.

Aıyptaý qorytyndysynda Ózbekstannyń telekomýnıkasıa salasynda jumys istegisi keletin shetel kompanıalary Karımovaǵa para tóleýi tıis bolǵany, Gúlnara «ózbek prezıdentiniń qyzy jáne ózbek sheneýnigi mártebesin paıdalanǵany», sol arqyly sheksiz yqpalǵa ıe bolǵany da aıtylǵan.

Tergeý aıasynda 340 mıllıonnan astam shveısar franky ($370,25 mln) Ózbekstanǵa qaıtarý maqsatynda tárkilengen. Buǵatta áli 440 mıllıon frank jatyr.

Shveısarıa federaldyq prokýratýra tergeýi 2012 jyly bastaldy. Tergeý barysynda 780 mıllıon shveısar franky, sonyń ishinde jyljymaıtyn múlikter, qolma-qol aqsha jáne baǵaly zattar tárkilendi.

Osy qylmystyq is boıynsha Shvesıada, Fransıada, Norvegıada, Nıderlandta, AQSH pen Ulybrıtanıada taǵy birneshe is qozǵalǵan.

Gúlnara Karımovanyń shetelde 1,4 mlrd dollarǵa jýyq aqshasy bary málim bolǵan. Ózbekstan úkimeti sonyń bir bóligin qaıtarýǵa tyrysyp jatyr.