Taraptar Germanıa Prezıdentiniń taıaýda Qazaqstanǵa jasaǵan sapary aıasynda qol jetkizilgen ýaǵdalastyqtardyń júzege asyrylý barysyn qarastyrdy. Atap aıtqanda, energetıka, tranzıt, logıstıka, paıdaly qazbalardy ıgerý, jańartylatyn energıa kózderi, aýyl sharýashylyǵy jáne sıfrlandyrý sekildi  yntymaqtastyqtyń basym baǵyttaryna qatysty birlesken jumystardy talqylady.

Kelissóz barysynda mádenı-gýmanıtarlyq baılanystardy, sondaı-aq eki eldiń ǵylymı jáne bilim berý uıymdary arasyndaǵy qatynastardy nyǵaıtý máselesine basa mán berildi.

Qasym-Jomart Toqaev pen Frank-Valter Shtaınmaıer Qazaqstan men Germanıanyń kópjaqty yntymaqtastyǵyn odan ári nyǵaıtý úshin birlesken is-qımyldardy arttyra túsýge ýaǵdalasty.

Memleket basshysy Germanıa Prezıdentiniń Bellevue rezıdensıasyndaǵy Qurmetti qonaqtar kitabyna estelik qoltańba qaldyrdy.