Aqtaýdaǵy №3 mekteptiń 11-shi synybynda oqıtyn qyz bala mektep ájethanasynda ómiri bolmaıtyn dárethana qaǵazy men suıyq sabyndy kórip, sol týraly 20 sekýndtyq vıdeo túsirgen:

"Komısıa kele jatyr da bizdiń mektepke. Úsh týalettiń úsheýinde de dárethana qaǵazy tur ǵoı! Ol ol ma, tipti qol jýatyn jerdegi sabyn salǵyshtyń ishinde suıyq sabyn tolyp tur. Bylaı negizi sabyn bolmaıtyn", degen qysqa ǵana sózin qosyp, jelige jarıalapty.

Sóıtsek, álgi qaǵaz ben sabynnyń shynymen de balalar úshin emes, komısıa úshin turǵanyn jarıa etip qoıǵany úshin mektep basshylyǵy oqýshynyń olımpıadaǵa qatysýyna tyıym salyp, áke-shesheńe aıyppul salamyz dep qorqytypty.

Bul mekteptiń dırektory – Qýanysheva Gúlmıra Balabaevna degen kisi.

Ekinshi vıdeoda álgi qyz jylap otyr:

"Áke-shesheńe shtraf salamyz, jarystarǵa barmaısyń dedi. Namysyma tıetin sózder aıtty. Nege óıtedi", dep kúıinedi.

Jasyratyn nesi bar, Qazaqstanda memlekettik mekeme ataýlynyń bári tek tekserip keletin komısıanyń kózin boıaý úshin jumys isteıdi.

Qazaqtyń mektebi qazaq balasyn eń aldymen tártipke, adaldyq pen jaýapkershilikke tárbıeleýi tıis edi-aý...

Biraq Qazaqstannyń búgingi júıesinde barlyq salalardyń irip-shirigeni sonsha, shyndyqty aıtqany úshin endigi mekteptegi balalardy jazalaı bastaǵan eken.

Al Oqý-aǵartý mınıstri Ǵanı Beısembaev bolsa, búgin Feısbýkte muǵalimder kúni merekesine oraı, Nurtóre Júsip, Asqat Aımaǵambetov, Tamara Dúısenova, Aıda Balaeva, Saıasat Nurbek, Ajar Ǵınıatqa «Ustazym meniń, ustazym!» atty chellendj joldady.