Shanhaıda oqyp, halyqaralyq ekonomıka jáne saýda mamandyǵyn meńgergen Aıda qyzmeti men bıznesimen qatar, shyǵarmashylyqpen de aınalysady eken. Ómirinen úzik syrlaryn shertip, qundy aqparattarmen bólisip, YouTube-te vıdeo blog júrgizedi.
Oqýdan elge oralǵan soń birer jyl Air Astana áýe kompanıasynda qyzmet etip, aýdarmashy bolǵan. Ózi saıahattaýǵa qushtar. Alǵash ret Fılıppınnen bastap, endigi álemniń 25 elin aralap tastaǵan eken. Qazir ol Dýbaıdaǵy munaı-gaz kompanıasynda jumys isteıdi.
Qamshy.kz eleýli jetistikterge jetken kreatıvti qazaq jastaryna kóz qyryn salyp, shetelde qyzmet etip, qazaqı brendin ashqan Aıda Aımenovany sózge tartty.
– Aıda, Dýbaıda qazir qandaı qyzmet atqarasyz?
– Munaı men gaz salasynda jumys isteımin. Kompanıany atamaı-aq qoıaıyn, biraq men jumys isteıtin jer óte jaqsy. Óz qyzmetkerlerine qamqorlyq jasaıdy jáne jumystyń ózi qyzyqty. Kompanıanyń HR qyzmetkerimin. Kóbine jańa qyzmetkerlermen ıntervú ótkizemin. Túsindire keteıin, bos orynǵa maman izdeıtin rekrýter emespin, ondaımen arnaıy agenttikter aınalysady. Men úshin eń qyzyǵy, túrli elderden kelgen adamdarmen jumys isteý.
– 25 elge saıahat jasaǵan ekensiz. Qandaı elder ómirge jaıly, mol múmkindikteri bar?
– Árıne, ár elde múmkindikter bar. Mysaly, men Japonıaǵa saparymda 3 jyldan astam ýaqyt sol jerde turatyn dosymmen kezdestim. Ol IT salasynda jumys isteıdi, oǵan bul el jumysyna da, janǵa da jaıly. Bári adamnyń ózine baılanysty dep oılaımyn. Shetelde jumys pen múmkindik izdemes buryn, aldymen sol eldegi naryqty zertteýdi usynar edim.
– Ózińiz kórip, tanyǵan eldermen Qazaqstandy salystyrasyz ba?
– Qazaqstandy shet eldermen ár turǵydan salystyrýǵa bolady, óıtkeni ár eldiń óz erekshelikteri men kemshilikteri bar.
Mysaly, Shveısarıada turǵyndardyń tabıǵatqa qalaı qaraıtynyn baıqadym. Olar qorshaǵan ortany taza ustaýǵa aıryqsha kóńil bóledi. Sondaı-aq, qart adamdar tańerteń sportpen shuǵyldanady, belsendi ómir saltyn saqtaý úshin taýǵa jınalady. Týrızm jaǵynan Shveısarıa óte tanymal. Qarap otyrsaq, Qazaqstanda da sondaı taýlar bar, týrızmdi damytatyn ádemi jerler da jetkilikti. Men 2 jylda bizdiń jerimizdiń sulýlyǵyn kórsin dep Dýbaıdan birneshe sheteldik dostarymdy, tanystarymdy jáne áriptesterimdi ákeldim. Qazaqstandyqtar ekologıa máselelerine kóp kóńil bólýi kerek dep oılaımyn, bul ár adamnan bastalýy kerek: qoqystardy suryptaý, tazalyqty saqtaý jáne t.b.
– Jetistikke jetýge kómektesetin 5 qasıetti ataı alasyz ba?
1) Oqý jáne bilim alý: úzdiksiz oqý jáne bilimdi keńeıtý tulǵanyń damýy úshin óte mańyzdy dep oılaımyn. Jańa daǵdylar men bilim kásibı jáne jeke tulǵa retinde damýǵa kómektesedi.
2) Ózin-ózi taný: ózińizdiń kúshti jáne álsiz jaqtaryńyzdy, qundylyqtaryńyz ben maqsattaryńyzdy túsiný – tabysty bolýdyń, damýdyń basty kepildigi. Ózin-ózi taný sizdiń kim bolǵyńyz keletinin jáne osy maqsatqa jetý úshin qandaı qadamdar jasaý kerektigin anyqtaýǵa kómektesedi.
3) Maqsat qoıý: maqsattardy anyqtap, olarǵa jetý úshin jospar qurý fokýs pen motıvasıany saqtaýǵa kómektesedi. Maqsattar naqty, qol jetimdi, ýaqytyly bolýy kerek.
4) Tulǵaaralyq qarym-qatynas daǵdylaryn damytý: adamdarmen tıimdi qarym-qatynas jasaý qabileti jeke damý men jetistikke jetýde mańyzdy ról atqarady. Basqany tyńdaı bilý, syılastyq, sondaı-aq týyndaǵan kilkiljinderdi sheshýdiń ońaı jolyn tabý mańyzdy.
5) Ýaqyt. Ýaqytty tıimdi basqarý ónimdilikke jáne nátıjelerge jetýge kómektesedi.
– Jetistikterińizde ata-anańyzdyń qandaı úlesi bar? Otbasyńyz jaıynda aıtyńyzshy.
– Árıne! Bala kezimnen ata-anam meni oqýǵa, damýǵa baýlydy. Áke-sheshem kóp qoldady, kómektesti. Anam maǵan árqashan bilimniń kúsh ekenin aıtatyn. Ońaılyqpen eshnárse bola qalmaıtynyn, bári de eńbek pen tabandylyq arqyly keletinin uqtyrdy. «Eshnárse aspannan túspeıdi» dep aıtyp otyratyn.
– Siz qazaq jastarynyń shetelge jumysqa ornalasýyna, aǵylshyn tilinde rezúme toltyrýyna kómek kórsetesiz. Qansha adamnyń sheteldik kompanıalarǵa qyzmetke ornalasýyna járdemdestińiz?
– Kóptegen konsýltasıalar ótkizdim jáne keńesime júgingenderdiń basym kópshiligi ózderi qalaǵan jumysqa ornalasty. Munda eń bastysy – tabandylyq! Qazir bireýi Londonda, basqalary Katarda, Dýbaıda, AQSH-ta jumys istep júr.
– Kıim brendin shyǵarý ıdeıasy sizge qalaı keldi?
– Ýnıversıtet qabyrǵasynda júrgende men bıznespen aınalysyp, shańǵy kostúmderin sattym. Qytaıdan Qazaqstanǵa taýar jetkizip otyratynmyn. Oraý, jınaqtaýǵa, ár detaline aıryqsha mán berdim. Tutynýshylarym rıza bolatyn. Biraq keıin bul isti tastap, bolashaqta óz brendimdi jasaımyn dep ózime sert ettim. Bul kún 5 jyldan keıin keldi, osylaı jaqynda KOSH brendimdi ashtym. Bul brend Qazaqstannan alysta bolsa da, týǵan jermen baılanysty saqtaý nıetinen týdy.
– Brendtiń atyn nege «Kósh» dep qoıdyńyz?
– «Kósh» degen kóshpendi sózinen shyqty. Bul árqashan qozǵalysta júretin, bir orynda turmaıtyn adamdy bildiredi. Bul brend ne demek? «Ózińe óziń úı bol, ózińe óziń shatyr bol», degendi estigen shyǵarsyz. Bul biz qaıda bolsaq ta, árqashan aınalamyzda jaıly keńistik qurýǵa tyrysýymyz kerek. Bul brend dástúrdi qazirgi zamanmen baılanystyrýdan týdy. Kıimimizdiń árbir bólshegi sizdiń qaı jerdiń týmasy ekenińizdi umyttyrmaý úshin jáne ózine degen senimdilik berý úshin ashyldy. Jalpy aıtqanda, biz basqa elde tursaq ta, qaıdan kelgenimizdi umytpaýymyz kerek!
Kıimdegi ár prıntke muqıat qarasańyz, oıý-órnek retinde beınelengen jer sharyn ańǵarasyz. Ol – adamnyń ózi shyqqan jerimen baılanysynyń mańyzdylyǵyn eske salady.
– Bolashaqqa josparlaryńyz bar ma?
– Jospar kóp. Óz brendimdi odan ári damytyp, basqa elderge tanytqym keledi. Qazirdiń ózinde sheteldikter qyzyǵa satyp alýda. Jalpy, qyzmetke keletin bolsaq, Eýropada jumys istep kórýge de bolady. Biraq ol elderde salyqtyń kólemi tym úlken. Deı turǵanmen, men jańa dúnıelerge qashan da ashyqpyn. Basqa elden usynystar túsip jatsa, nege kórmeske?!
– Qazaq jastaryna qandaı keńes berer edińiz?
Bilim – bolashaqqa eń mańyzdy ınvestısıa. Jańany úırenýge umtylý kerek! Saıahat, ózge mádenıetpen, túrli adamdarmen tanysý – kókjıekti keńeıtedi. Sátsizdikten qoryqpaý kerek.
– Suhbatyńyzǵa rahmet!
Posmotret etý pýblıkasıý v Instagram
Pikir qaldyrý