Astana qalasynyń ákimi Jeńis Qasymbektiń qatysýymen Amanat partıasy Astana qalalyq fılıaly «Halyqpen birge!» saılaýaldy baǵdarlamasynyń Jol kartasyn iske asyrý barysy týraly Astana qalalyq máslıhaty fraksıasynyń VII jınalysy ótti.

Saılaýaldy baǵdarlama negizgi 4 baǵyttan turady. Bıyl 126 tarmaqty quraıtyn Jol kartasynyń 117 tarmaǵy oryndalý barysynda. Al qalǵan 9-y boıynsha oryndalý merzimi bastalǵan joq.

Qazan aıynda Astana qalasy boıynsha saılaýaldy baǵdarlamanyń oryndalýyna júrgizilgen taldaýǵa sáıkes, 2023 jyly oryndalatyn 117 is-sharanyń 47-si máresine jetse, oryndaý satysynda 70-i tur. Jeńis Qasymbek Jol kartasynyń tarmaqtary boıynsha naqty atqarylǵan jumystardy atap ótti.

«Qurylys jumystarynyń kólemi 7,2 paıyzǵa artty. 2,9 mln sharshy metr turǵyn úı paıdalanýǵa berildi, bul ótken jyldyń sáıkes kezeńimen salys­tyrǵanda 49 paıyzǵa artyq. Taýar aınalymy boıynsha sońǵy birneshe jylda Astana shaǵyn jáne orta bıznestiń úlesi boıynsha kóshbasshylyǵyn saqtap keledi. Bıylǵy birinshi jartyjyldyqta bul kórsetkish 73 paıyzdy qurady, bul ortasha respýblıkalyq kórsetkishten 2 esege kóp. Jumyssyzdyq deńgeıi 4,4 paıyzdy qurady, bul ortasha respýblıkalyq deńgeıden 4,7 paıyzǵa tómen. Jumyspen qamtý is-sharalarymen 23 myń adam qamtyldy. 12 myńnan astam adam jumysqa ornalasty, onyń ishinde 7,5 myń adam turaqty jumys oryndaryna ıe boldy. Jumyssyzdarǵa kómek kórsetý jáne olardy jumyspen qamtýǵa járdemdesý úshin «Joltap» jobasy iske qosyldy, onyń sheńberinde «Barshaǵa qoldaý» modýldik pýnktteri arqyly turǵyndar kiristerdi arttyrý múmkindikteri boıynsha keńes ala alady. Infraqurylymǵa kelsek, №3 jylý-elektr ortalyǵynyń birinshi kezegi men «Turan» jáne «Ońtústik-SHyǵys» eki gaz jylý stansıasynyń qurylysy aıaqtaldy, bul qosymsha 1130 Gkal jylý qýatyn qamtamasyz etti. Maýsym aıynda Astana sý qoımasynan qosymsha sý qubyry iske qosyldy, bul táýligine 90 myń tekshe kóleminde qosymsha sý berýdi qamtamasyz etti. Búgingi tańda qalada sý tapshylyǵy baıqalmaıdy. Avtokólik qozǵalysy týraly aıtsaq, negizgi magıstraldardaǵy júktemeni azaıtý úshin qazan aıynyń sońynda ál-Farabı dańǵylynan Táýelsizdik dańǵylyna deıingi jańa kópir arqyly jol ashyldy. 165 qoǵamdyq jáne aýla keńistigin abattandyrý aıaqtaldy. Jalpy 45 jasyl aımaq quryldy, onyń ishinde 2 saıabaq, 10 skver jáne 33 qoǵamdyq keńistik bar. Bul – qala turǵyndary men qonaqtaryna jaqsy tanys jerler. Qalada kezekte turǵan ártúrli sanattaǵy 1,4 myń otbasyna, sonyń ishinde jetimderge, kópbalaly analarǵa, áleýmettik jaǵynan ahýaly tómen jáne jalǵyz turǵyn úıi apatty dep tanylǵandarǵa baspana berildi. Bıyl 14 jańa mekteptiń qurylysy aıaqtalady. Onyń 6-ýy paıdalanýǵa berildi, 8 mekteptiń qurylysy jalǵasýda (jyl sońyna deıin iske qosý josparlanýda). Budan basqa, «Jaıly mektep» jobasy boıynsha 2025 jylǵa qaraı 90 myń oqýshyǵa arnalǵan 24 mektep salynady. Onyń 15-i Esil men Nura aýdandarynda ornalasady» dedi ákim.

Amanat partıasy Astana qalalyq fılıalynyń atqarýshy hatshysy Saqtaǵan Sádýaqasov sóz sońynda saılaýaldy baǵdarlamanyń oryndalýyn jan-jaqty baqylaýdy qamtamasyz etý qajettigin tilge tıek etti.

«Saılaýaldy baǵdarlama – strategıalyq qujat, osy baǵdarlamamen saılaýǵa tústik. Saılaýshylarymyz bizge, bizdiń baǵdarlamamyzǵa sendi. Máslıhattaǵy 34 orynnyń 29-y – bizdiń partıalyqtar, bizdiń saılaýshylarymyz bizden nátıje kútýde, bul – partıa men bılikke, partıa múshelerine, basshylyq laýazymdarǵa degen senim» dedi ol.

Fraksıada Jol kartasynyń oryndalýyna jasalǵan monıtorıń qorytyndysy talqylanyp, qaralǵan máselelerge depýtattar tarapynan usynystar aıtyldy.