Keshe Astana qalasy ákimdigi janyndaǵy áıelder isteri jáne otbasylyq demografıalyq saıasat jónindegi komısıa­nyń kezekti otyrysy ótti. Jıynǵa atalǵan komısıa tóraǵasy, qala ákiminiń orynbasary Eset Baıken, komısıa músheleri, basqarma basshylary qatysty.

Qalalyq İshki saıasat basqarmasynyń basshysy Nurdáýlet Álmuhanov bıyl áleýmettik memlekettik tapsyrys aıasynda 11 joba júzege asyrylsa, otbasy ınstıtýtynyń mańyzyn eskere otyryp, sonyń úsheýi otbasy máselesine arnalǵanyn atap ótti.

– Bul jobalardyń qatarynda tatýlastyrý ortalyǵyn qurý, medıasıa kabınetiniń jumysyn jolǵa qoıý bar. Atalǵan kabınet osymen ekinshi jyl jumys istep, bıyl 10 aıda 300 adamǵa kómek kórsetti. Onyń ishinde 180 áıelge ishki ister organdarymen birge turmystyq zorlyq-zombylyq boıynsha profılaktıkalyq jumystar júrgizildi. Búgingi tańda 29 otbasy boıynsha medıasıalyq kelisim jasalyp, taraptardyń kelisimimen tatýlasýǵa sheshim shyǵaryldy. 32 adam ońaltý kýrsynan ótti. Sonymen qatar genderlik mádenıetti qalyptastyrýǵa baǵyttalǵan keshendi is-sharalar júrgizýdemiz, – dedi basqarma basshysy.

Kún tártibindegi máseleler boıynsha sóz alǵan qalalyq Jumyspen qamtý jáne áleýmettik qorǵaý basqarmasynyń basshysy Ilá Skýb bul basqarmada bıylǵa memlekettik áleýmettik tapsyrystar maqsatty toptardyń qajettilikterine qaraı jáne halyqtyń suranysyn baǵalaýǵa baǵyttala bekitilgenin jetkizdi.

– 2023 jylǵa áleýmettik jobalardyń 5 salasy boıynsha 28,8 mln teńge bólindi. Bul – estý qabileti tómen adamdardy áleýmettik qoldaý, aýtızm dıagnozy bar balalardy ońaltý, erekshe qajettiligi bar jandardy ońaltý tehnıkalaryna tehnıkalyq qyzmet kórsetý jáne jóndeý, abaqtydan shyqqan adamdardy ońaltý boıynsha az qamtylǵan adamdarǵa qyzmet kórsetý baǵytyndaǵy jobalar, – dedi atalǵan basqarma basshysy.

Otyrys barysynda sondaı-aq turmystyq zorlyq-zombylyq deńgeıin tómendetý, jasóspirimder arasynda qylmysty boldyrmaý, qaladaǵy bilim berý uıymdaryndaǵy jastardyń qaýipsizdigin qamtamasyz etý máseleleri de sóz boldy. Jastar saıasaty máseleleri jónindegi basqarma ókilderi memlekettik áleýmettik tapsyrys aıasynda júzege asyp jatqan 6 joba týraly aqparat berdi.

– Qozǵalyp otyrǵan turmystyq zorlyq-zombylyq máselesi qazirgi qoǵamnyń qasiretine aınalyp otyr. Sońǵy oryn alǵan oqıǵalar – sonyń aıqyn kórinisi. Ókinishke qaraı, turmystyq zorlyq-zombylyq kóptegen otbasynyń kúndelikti ómir súrý ádetine aınalyp, otbasy qundylyǵynyń álsireýine ákelip jatyr. Memleket basshysy Qasym-­Jomart Kemelulynyń óz Joldaýlarynda azamattar men qoǵam tarapynan otbasyndaǵy zorlyq-zombylyq jasaǵany úshin jazany kúsheıtý qajettigi týraly úndeýlerdiń jıilep ketkenine basa nazar aýdaryp, turmystyq zorlyq-zombylyqtyń elimizdegi úlken problemanyń birine aınalǵanyn atap aıtty. Bul rette daǵdarys ortalyqtary turmystyq zorlyq-zombylyq qurbandaryna arnaıy áleýmettik qyzmetter kórsete otyryp, ońaltý jumysyn júrgizýde, – dedi «Úmit» daǵdarys ortalyǵynyń dırektory Ǵalıhan Qoqanbekov.