Reseıdiń memlekettik propagandasyn júrgizetin kezekti bir jýrnalısiń baıbalamy búgin basty taqyrypqa shyǵypty.

Bul áńgimeni byqsytqan Tına Kandelakı deıtin óziniń ulty grýzın áıel. Qazaqstandaǵy temirjol beketteriniń ataýy qazaqshalanǵanyna kúıip-pisken eken. Qazaqstan "Ýralsk" degen ataýdy "Oral" dep, "Saı-Ýtes" ataýyn "Saıótes" dep, "Ýzen" degen ataýdy "Ózen" dep ózgertkeli jatyr, bular orys tiline tyıym salyp, orys mektepterin jaýyp jatyr dep...

Pýtın bıliginiń propagandısi dep tanylǵan medıa tulǵanyń aıdalada otyryp, otqa maı quımaq bolǵan túri. Qazaqstandaǵy ataýlar qazaq tiline kóship jatqanymen, Qazaqstannyń ózi birtindep orys tiliniń ekinshi otanyna aınalyp bara jatqanyn Tına tátem qaıdan bilsin?!

Onyń osy jazbasyna Qazaqstan qoǵamynyń eleń etýiniń ózi bizdiń eldiń aqparattyq keńistigi orys tilinde saırap turǵanyn aıdan anyq bildirip tur emes pe?

Tına tátege Qazaqstanǵa kelý kerek. Bizdiń qoǵam týraly syrtymyzdan ton pishpeı. Áýejaıdan túse sala kórsin, qýana kútip kelgen qansha jýrnalıs ózin tanıtynyn, olar qaı tilde sóıleıtinin. Kez-kelgen restoranymyzǵa kelip, as mázirin oqysyn. Elimizdiń eń iri eki qalasy – Almaty men Astanadaǵy aýlalarda, mektepten shyqqan balalardyń qaı tilde shúıirkelesip júrgenin, aldyńnan shyqqan kúzetshi, taksıst, polıseı, qonaq úı qyzmetkeri qaı tilde amandasatynyn, metro men avtobýsta qaı tildiń shynymen basym ekenin kórsin. Qazirgi Qazaqstan degen aýyldy jerlerin aıtpaǵanda negizinen orystildi qoǵam ekenine kózi tez-aq jeter edi ǵoı...

Táýelsizdik alǵaly talaı jyl ótse de orys tilinen ajyramaq túgili, oǵan odan saıyn jarmasyp qalǵan Qazaqstandaı elden aınalyp ketpeı me, Reseıdiń shyn propagandısi bolsa.

Árıne, qazirgi ekijúzdi zamanda árkim óziniń kórgisi keletin "shyndyǵyn" ǵana kóredi. Qazaqtyń da osyndaı "óz shyndyǵy" bar endi, keshirersiz...

Kandelakıge aqyl aıtpaımyz ǵoı. Óziniń kindik qany tamǵan týǵan eliniń, tarıhy tym tereńnen kele jatqan týǵan ultynyń taǵdyry bárinen de mańyzdy ekenin túsinetin kezi keler.