Qujat Memleket basshysynyń joldaýyndaǵy tapsyrmalaryn iske asyrý úshin depýtattardyń bastamasymen ázirlendi. Májilis depýtaty, AMANAT partıasy fraksıasynyń depýtaty Juldyz Súleımenova zań jobalaryna zorlyq-zombylyqqa, basqa da qatygezdikke nemese adamnyń ar-namysyn qorlaýǵa jol bermeý úshin birqatar norma engizilgenin aıtty.

- Birinshiden, densaýlyqqa jeńil zıan keltirgeni úshin 200 AEK-ke deıin aıyppul túrindegi jaza ne 200 saǵatqa deıin qoǵamdyq jumystarǵa tartý nemese 50 táýlikke deıin qamaýǵa alý. Uryp-soqqany úshin 80 AEK-ke deıin aıyppul ne 80 saǵatqa deıin qoǵamdyq jumystarǵa tartý nemese 25 táýlikke deıin qamaýǵa alý. Ekinshiden, kámeletke tolmaǵan ne dármensiz kúıdegi adamdy azaptaý, densaýlyǵyna aýyr jáne ortasha zıan keltirgeni úshin jazanyń «bas bostandyǵyn shekteý» balama túri alynyp tastalyp, tek bas bostandyǵynan aıyrý qarastyrylady, - dedi ol.

Depýtattyń aıtýynsha, jas balany óltirgeni nemese pedofılıa úshin «ómir boıy bas bostandyǵynan aıyrý» jazasy qoldanylady.

- Úshinshiden, kámeletke tolmaǵandarǵa qatysty nemese otbasynda ákimshilik, qylmystyq quqyqbuzýshylyq jasaǵan adamdardyń minez-qulqyna erekshe talaptar qoldanylady. Atap aıtqanda, sot sheshimi boıynsha olardan medısınalyq uıymdardan psıhologıalyq kómek talap etilýi múmkin. Sondaı-aq zorlyq-zombylyq derekterin ýaqytyly anyqtaý úshin ýákiletti organdardyń buqaralyq aqparat quraldaryndaǵy habarlamalarǵa den qoıý múmkindigi qarastyrylǵan, - dedi ol.

Sondaı-aq sýısıdke ıtermelegender de qylmystyq jaýapkershilikke tartylady.

- Sýısıdtiń aldyn alý maqsatymen ózin-ózi óltirý nemese oǵan ıtermelegeni úshin 5 jyldan 9 jylǵa deıin bas bostandyǵynan aıyrý jazasy usynylady. Sýısıdti nasıhattaǵany úshin 200 AEK mólsherinde aıyppul túrinde jańa qylmystyq jaýapkershilik qarastyrylady. Sonymen qatar kámeletke tolmaǵan balany qorqytý jáne kıberbýllıng úshin ákimshilik jaýapkershilik engiziledi, - dedi ol.