Almaty oblysynda jalpy quny 70 mıllıard teńgege jýyqtaıtyn aýqymdy ınvestısıalyq joba júzege asyrylmaq. Bul týraly oblys ákiminiń baspasóz qyzmeti habarlady.

«Focus Logistics» JSHS oblystyń ońtústik óńirinde logıstıkalyq park salý boıynsha iri jobany qolǵa aldy. Ony júzege asyrý aımaqtyń logıstıkalyq ınfraqurylymyn damytý úshin jańa múmkindik beredi. Joba aıasynda 4500-den astam jańa jumys orny qurylmaq ári 300 000 sharshy metrden astam qoıma alańy iske qosylady. Jobanyń aıaqtalý merzimi 2028 jyl dep kórsetilgen.

Jobanyń birinshi kezeńi boıynsha shamamen 94 ga aýmaqta «OZON» kompanıasyna arnalǵan «A» synypty qoıma qurylysy júrgizilýde. Ótken jyly atalǵan qoımanyń irgetasyn qalaý rásimi ótkizildi. Qazirgi ýaqytta qurylys-montaj jumystary jalǵasýda.

Atalǵan logıstıkalyq parktiń Úlken Almaty aınalma jolynyń boıynda ornalasýy kóptegen artyqshylyqtar beredi. Ásirese, tıimdi jumys isteýine kóp septigin tıgizedi. Bul strategıalyq oryn negizgi magıstraldarǵa ońaı qol jetkizýdi qamtamasyz etedi ári basqa aımaqtarmen jáne qalalarmen jeńil baılanysýǵa múmkindik beredi. Osyndaı yńǵaıly orynnyń arqasynda logıstıkalyq park taýarlardy tasymaldaý jáne taratýmen aınalysatyn kompanıalar úshin tıimdi ortalyqqa aınalady dep kútilýde.