Erbolat Sársembaev týraly qysqasha toqtala ketsek, kıno salasynda 2009 jyldan beri eńbek etip keledi. Sonymen qatar ol qazir armandaǵan jobasy – ǵylymı-fantastıkalyq fılmmen aınalysady. Erbolat alǵashqy beıneınjenerlik jumysyn jasaý úshin Adobe After Effects qoldanbasyn paıdalanypty. 

• Medeýde avtokólik festıvali ótip jatqanyn bilip, kólikterdi jalǵa alýdy jón kórdim. Men biregeı nárse jasaǵym keldi, óńdeýdi jańa jolmen qoldanǵym keldi. Árıne, shyǵarma eksperımenttik sıpatta bolǵandyqtan, ony shyǵaramyn ba, joq pa degen kúmánim boldy. Biraq beınerolık shyqqannan keıin bári ózgerdi - bul búkil álemdegi avtomobıl kontent ındýstrıasyna áser etti, - deıdi Erbolat Sársembaev.

Beınejazba jarıalanǵannan keıin ár eldiń mamandary keńes pen nusqaý alý úshin Sársembaevqa júgine bastaǵan. Onyń bul jumysy suranysta bolsa da, eshqandaı aqy almastan, Erbolat óz ázirlemelerin tegin bergen. «Kóbisi meniń jumysymdy qaıtalaýǵa tyrysty. Biraq bul aıtarlyqtaı ońaı emes. Tipti After Effects-tegi kóp jyldyq tájirıbem bolsa da, bir jumysty jasaýǵa bir apta ýaqytym ketti», - deıdi ol.

Qazirgi tańda Transform Transition effektisi jahandyq trendke aınalǵan. Tipti álemdik blogerler men kontentmeıkerler ony óz jobalarynda belsendi qoldana bastaǵan da. Degenmen, Erbolat atap ótkendeı, salaǵa dem bergen ádisteme Almatyda jasalǵan.   

«Jalpy YouTube-te mundaı effektilerdi qalaı jasaýǵa bolatyny jaıynda kóptegen vıdeorolıkter bar. Biraq eshqaısynda bul jumysty meniń jasaǵanym týraly aıtylmaıdy. Men oǵanr renjimeımin de. Kerisinshe, meniń jumysymnyń ózgelerdi shabyttandyratynyna jáne kópshilikke qajet bolǵanyna qýanyshtymyn. Ári Qazaqstanda da beıneınjenerıa salasynda joǵary bilikti mamandar bar ekenin álem bilse deımin», - deıdi Erbolat sóz arasynda.