ORAL. QazAqparat - Batys Qazaqstan oblysyna sońǵy bes jylda 402 jas maman kelse, sonyń teń jartysy aýyldyq jerlerge jiberildi.
Oblystyq densaýlyq saqtaý basqarmasynyń basshysy Qamıdolla Irmenovtiń aıtýynsha, 2011 jyly óńirge 43 (20-sy aýyldarda oryn tepti), 2012 jyly 82 (34), 2013 jyly 126 (64), 2014 jyly 64 (32), bıyl 87 maman (52) keldi. Solardyń 30-35 paıyzy - basqa óńirdiń azamattary. Qazirgi kezde Batys Qazaqstanda Almaty, Qyzylorda, Qaraǵandy, Qostanaı oblysynan qonys aýdarǵan dárigerler jumys jasaýda. Olardyń ishinde is-tájirıbesi jetkilikti, bilikti mamandar da bar.

Elbasynyń «Dıplommen aýylǵa» baǵdarlamasyna sáıkes aýyl-aımaqqa bet alǵan jas mamandarǵa qamqorlyq kórsetiletini belgili. Olarǵa kóterińki járdemaqyǵa qosa turǵyn úı alý úshin jeńildikpen nesıe beriledi. Ótken jyly osy baǵdarlamaǵa sáıkes 32 maman baspanaǵa qol jetkizse, bıyl taǵy 15-i turǵyn úımen qamtylmaqshy.

Eger budan bes jyl buryn oblysta 250 dáriger jetispese, qazir bul kórsetkish on esege qysqardy. Kúni búgin 25 maman, sonyń ishinde jalpy tájirıbe dárigeri, akýsher-gınekolog, anestezıolog, pedıatr-neonatologtar (qalaǵa - 15, aýyldyq jerge - 10) kerek. Aýdandar arasynan, ásirese, Bórlide dárigerlerge muqtajdyq kóbirek bilinýde.

Aıta keteıik, oblysta búgingi tańda 1532 dáriger (qamtylýy10 myń adamǵa shaqqanda - 25,5), 5596 orta býyn qyzmetkeri (10 myń adamǵa shaqqanda - 88,8) eńbek etedi. Dárigerlerdiń orta jasy - 35-37. Óńir orta býyn medısına qyzmetkerlerimen tolyq qamtamasyz etilgen.

Derekkóz: QazAqparat