ALMATY. QazAqparat - Búgin Almatyda QR İİM Tótenshe jaǵdaılar komıtetininiń aýmaqtyq bólimshesi Almaty qalalyq TJD qyzmetkerleri ózderiniń kásibı merekesi - Qutqarýshylar kúnin atap ótti. Onyń ústine, bıyl QR İİM Tótenshe jaǵdaılar komıtetiniń qurylǵanyna 20 jyl tolyp otyr.
«Alataý» mádenıet saraıynda ótken merekelik sharaǵa Almaty qalalyq TJD barlyq qurylymdyq bólimsheleri, Almaty qalasynyń qutqarý qyzmeti, «Apattar medısınasy ortalyǵy» men «Qazseldenqutqarý» memlekettik mekemeleriniń basshylary jáne osy salada kóp jyl eńbek etken ardagerler qatysty. Sahnaǵa aldymen Almaty TJD qalalyq garnızonynyń jaýyngerlik týy engizildi.
Óz sózinde Almaty qalasy TJD bastyǵynyń mindetin atqarýshy, polkovnık Nurlan Madárov QR İshki ister mınıstri Qalmuhanbet Qasymovtyń quttyqtaý sózin oqydy.
«Mine, 20 jyldan beri elimizdiń qutqarýshylary men órt sóndirýshileri halyqtyń qaýipsizdigin saqtaýǵa kúsh salyp keledi. Olar kez-kelgen sátte kómek kelýge daıyn. Osy jyldar ishinde Qazaqstanda tótenshe jaǵdaılardyń aldyn alý jáne joıý boıynsha tıimdi júıe quryldy. Tájirıbe jınaqtaldy jáne tehnıkalyq jaǵynan oıdaǵydaı jabdyqtaldy. Búginde azamattyq qorǵanys salasynda elimiz boıynsha 30 myńnan astam adam eńbek etýde. Qutqarýshy - bul ómir súrý salty. Bul qashanda erlik jasaýǵa, ózin qurban etýge daıyn bolý. Qutqarýshy mamandyǵyn tek batyl adamdar ǵana tańdaıdy», - delingen quttyqtaýda.
Budan keıin polkovnık Nurlan Ábilbaıuly úzdik qutqarýshylardy jáne ardagerlerdi «Tótenshe jaǵdaılar komıtetine 20 jyl» medalimen marapattady. Budan ári búgingi jıyn merekelik konsertke ulasty.
«QazAqparat» tilshisine bergen suhbatynda Almaty qalalyq TJD Órt sóndirý jáne apattyq qutqarý jumystary qyzmeti bastyǵynyń orynbasary, órtke qarsy qyzmet kapıtany Baǵdat Shaızada Almatyda qazirgi tańda 2 myńǵa jýyq qutqarýshyr jumys isteıtindigin aıtty.
«Almaty qalasynda kún saıyn 300-den astam qutqarýshy táýliktik jumysqa túsedi. Kún saıyn órtke, jol-kólik oqıǵasyna, tabıǵı, tehnogendik jáne basqa da tótenshe jaǵdaılarǵa baılanysty 100-ge tarta shaqyrtýlar bolyp turady. Solardyń ishinde eń kóbi - órtke qatysty kúnine 30-ǵa jýyq shaqyrtý túsedi. Qala halqynyń sany, qalanyń aýmaǵy jyldan-jylǵa ósip jatyr. Záýlim turǵyn úıler salynýda. Al adamdar órt qaýipsizdigin saqtaı bermeıdi. Sáıkesinshe, órtke qatysty shaqyrtýlar jıi bolady. Sondyqtan da órt sóndirýshilerdiń sany basqa qurylymdarǵa qaraǵanda kóp. Bul salada qazir 1245 adam eńbek etedi. Jalpy, qutqarýshynyń jumysy qıyn da qaýipti, abyroıly da maqtan tutarlyq jumys. Meniń osy salada qyzmet etip kele jatqanyma 10 jyl boldy», - dedi ol.
Aıta ketelik, búgingi merekelik shara aıasynda «Alataý» mádenıet saraıynyń aldyna túrli qutqarý operasıalaryn júrgizýge paıdalanylatyn tehnıkalar qoıyldy. Olardyń ishinde satysynyń bıiktigi 90 metr bolatyn kópfýnksıonaldy órt sóndirý mashınasy jáne jolsyzben júre alatyn avtokólikter bar.
Derekkóz: Qazaqparat
