ALMATY. QazAqparat - Búgin Almatyda kórnekti aqyn, Qazaqstannyń halyq jazýshysy, belgili qoǵam qaıratkeri Oljas Súleımenov ál-Farabı atyndaǵy Qazaq ulttyq ýnıversıtetiniń oqytýshylary jáne stýdentterimen kezdesti.
Bul kezdesý Semeı ıadrolyq polıgonynda jasalǵan sońǵy ıadrolyq jarylystyń 26 jyldyǵyna oraılastyryldy.

Óz sózinde Oljas Súleımenov 1989 jyly 19  qazanda Keńes Odaǵy telegraf agenttiginiń Semeı polıgonynda kezekti jarylys jasalǵandyǵy  týraly habar taratqan soń, «Nevada-Semeı» qozǵalysy ıadrolyq jarylysqa qarsy Almaty, Semeı, Pavlodar, Qaraǵandy, Saran jáne Máskeý qalalarynda jınalystar, mıtıńiler uıymdastyrylǵandyǵyn aıtty.   

«Biz qozǵalysty qurǵan kezde stýdentter bizge óte jaqsy kómektesti. Olar polıgondy jabý boıynsha halyqtan qol jınady. Sóıtip, bir-eki aptanyń ishinde eki mıllıonnan astam qol jınady. Halyqtyq jáne parlamenttik dıplomatıa, mine, osyndaı nátıje berdi. Biz qozǵalysty 1989 jyly 28 aqpanda qurdyq. Al sol jyly 19  qazanda sońǵy jarylys boldy. Keıin, kóp uzamaı 23  qazanda polıgondy jabý týraly másele kóterdik. Ol suraq daýysa salyndy. Sóıtip, Joǵarǵy Keńes ony tolyǵymen qoldap daýys berdi. Sodan 1989 jyly 20 qazanda «KSRO úkimeti Semeı ıadrolyq synaq polıgonyn jabý máselesin qarasyn» degen qaýly shyǵaryldy», - dedi O. Súleımenov. 

Ol sonymen qatar qazirgi tańda jyl saıyn el bolyp atap ótilýi kerek eki ataýly kún bar ekendigin jetkizdi. Olar 1989 jyldyń 28  aqpany - «Nevada-Semeı» qozǵalysy jáne 1991 jyldyń 29  tamyzy - Semeı polıgonynyń tolyq jabylý kúni.

BUU Bas Assambleıasy 29  tamyzdy - Halyqaralyq ıadrolyq synaqqa qarsy narazylyq kúni dep jarıalady. Al ony halyqaralyq kúntizbege engizý máselesin birinshi bolyp qazaqstandyqtar kótergen. Qazir ol jyl saıyn búkil álemde atap ótiledi.

Oljas Súleımenov sóz sońynda «Nevada-Semeı» qozǵalysynyń budan keıigi qyzmetiniń ıadrolyq synaqtarda búkil álemde boıynsha toqtatýǵa baǵyttalǵandyǵyn atap ótti. 

Al búgingi kedesýdi ál-Farabı atyndaǵy QazUÝ men «Nevada-Semeı» qozǵalysy uıymdastyrdy.

Derekkóz: Qazaqparat