ASTANA. QazAqparat - 15 qazanda «Rixos Khadisha Shymkent» qonaqúıinde Óńirlik kásipkerlik keńesi men Shymkent qalasy ákimdiginiń birlesken jıyny ótti. Alqaly keńeske belgili kásipkerlermen qatar, oblys ákiminiń orynbasary Saparbek Tuıaqbaev, Shymkent qalasynyń ákimi Ǵabıdolla Ábdirahymov jáne OQO Kásipkerler palatasynyń dırektory Asqar Ábýbákirov qatysty, dep habarlaıdy qala ákiminiń baspasóz qyzmetinen.
Jıyndy kirispe sóz sóılep ashqan Shymkent qalasynyń ákimi Ǵabıdolla Ábdirahymov kezdesýdiń mańyzdylyǵyna toqtalyp, oblys kásipkerleriniń qalalyq qurylymdaryna qatysty máselelerge toqtaldy.
Onyń aıtýynsha, qazirgi tańda qalanyń kórkeıýine, ósip-órkendeýine óz úlesterin qosyp jatqan kóptegen iri bıznesmender bar. Mıllıondy megapolıs bolyp qalyptastyrýda bolashaqta da otandyq ınvestorlardy belsendi bolýy tıis.
- Biz qaladaǵy retsiz saýda men bazarlardy joıyp, zaman talabyna saı saýda oryndary men alyp dúkenderdi salýymyz kerek. Josparymyz boıynsha 2017 jyldan bastap iri bazarlardyń bári qala syrtynda bolady. Tek jemis-jıdek pen kókónis satatyn saýda oryndary qalady. Qala ishindegi bazarlar shahardyń jańa kelbetin aıshyqtap, ajaryn ashyp turatyn sıpatta bezendiriledi, - dedi qala ákimi.
Basqosýda sóz alǵan óńirimizge tanymal bıznes salasynyń ókilderi Serikjan Seıitjanov, Qaırat Balabıev jáne Qaırat Moldaseıitov Shymkenttiń damýy jolyndaǵy barlyq oń bastamalarǵa qoldaý bildiretindikterin jetkizdi.
- Búgingi jıynda aıtylǵan máseleler óte oryndy. Ortaq maqsattaǵy jumysqa bıznesmender de atsalysý kerek. Shymkenttiń áleýetin arttyrý baǵytynda qalamyzda Qazaq ınovasıalyq ýnıversıtetin salýdy josparlap otyrmyz. Munda shetelden bilikti mamandar shaqyrtylyp, medısınalyq jáne tehnıkalyq mamandardy daıarlaıtyn bolady. Bul jaqyn bolashaqta júzege asady. Jalpy, qalanyń ınfraqurylymyn damytý boıynsha jańa josparlar jasalyp jatyr, - dedi kásipker S.Seıitjanov.
Aıta ketý kerek, kezdesý barysynda Shymkent qalasy ákimdigi men OQO Kásipkerler palatasy arasynda ózara yntymaqtastyq memorandýmyna qol qoıyldy.
- Kásipkerlik sektory memleketke salyq tóleý arqyly qala qazynasyn ulǵaıtady. Bul rette áleýmettik salyq pen jer, kólik salyǵyn retteýdi usynamyn. Sondaı-aq «qolma qol» beriletin ústemaqylardy da zańdastyryp, jumyspen qamtylǵan qyzmetkerlerdiń jalaqysy arqyly túsetin kóleńkeli tabystyń salyǵyn da júıeleý kerek, - dedi qala ákimi.
Jıyn sońynda shahar basshysy Ǵabıdolla Ábdirahymov Shymkenttiń jańa zamanaýı kelbetin qalyptastyrýda kásipkerlerdi kúsh biriktire otyryp, birlese jumys atqarýǵa shaqyrdy.
Derekkóz: QazAqparat
