ORAL. QazAqparat - «Nur Otan» partıasy BQO fılıaly ǵımaratynyń úlken zalynda «Munaıgaz kesheninde qýat únemdeý jáne balamaly energetıka» máseleleri boıynsha Hİİ halyqaralyq Nadırov oqýlarynyń plenarlyq májilisi ótkizildi.
Oǵan belgili hımık-ǵalym, QR Ulttyq ǵylym akademıasynyń akademıgi, Qazaqstan ǵylymy men tehnıkasynyń eńbek sińirgen qaıratkeri, Memlekettik syılyqtyń ıegeri, profesor Nadır Nadırov qatysyp, mundaı jıynnyń ǵylym úshin, qazaqstandyq jáne reseılik ǵalymdardyń bir-birimen tájirıbe almasyp, jańa ıdeıa-jobalardy júzege asyrýy úshin orny aıryqsha ekendigin atap kórsetti.

BQO ákiminiń birinshi orynbasary Arman Óteǵulovtyń aıtýynsha, osyndaı jıyndarda jańa oı-ıdeıalar týyndap, shyǵarmashylyq izdenisterge jol ashylady. 2001 jyldan beri ótkizilip kele jatqan halyqaralyq Nadırov oqýlary ǵylymdaǵy yqpaldastyqtyń qazirgi zamanǵy úlgisin qalyptastyrýdy kózdeıdi. Ásirese, munaıgaz salasyndaǵy ǵylymı-tehnıkalyq, ekologıalyq máselelerdi sheshý erekshe mánge ıe. Ǵylym tereń de qajyrly eńbek-izdenistersiz alǵa basýy múmkin emes. Sondyqtan zaman aǵymyna ilesý úshin ǵylymǵa negizdelgen jańa tehnologıalardy engize bilýdiń mańyzy zor.

Oral qalasynda osymen ekinshi ret uıymdastyrylyp otyrǵan forýmǵa Qazaqstannyń ózge óńirlerinen, sondaı-aq Reseıdiń kórshiles oblystarynan ǵalymdar keldi. Olar eki kúnge sozylǵan jıyn barysynda plenarlyq májilis pen seksıalyq otyrystarda óz oı-tolǵamdarymen bólisip, tyń usynys-pikirlerin ortaǵa saldy.

Nadırov oqýlary kezinde batysqazaqstandyq kásipker-ǵalym, QR Ulttyq ınjenerlik akademıasy BQO fılıalynyń tóraǵasy, «QazIITÝ» ǵylymı-bilim kesheniniń prezıdenti, tehnıka ǵylymdarynyń kandıdaty, oblystyq máslıhattyń depýtaty Aqserik Áıtimovke atalmysh akademıanyń altyn medali tabys etildi.

Derekkóz: QazAqparat