BÝRABAI. QazAqparat - TMD elderi prezıdentteri halyqaralyq lańkestikpen kúres týraly málimdeme jasaıdy. Bul týraly búgin Aqmola oblysyna qarasty Býrabaı kýrorttyq aımaǵynda bastalǵan Táýelsiz memleketter dostastyǵy Memleket basshylary keńesiniń otyrysy barysynda QR Prezıdenti Nursultan Nazarbaev aıtty, dep habarlaıdy QazAqparat tilshisi.
«Memleket basshylary keńesiniń búgingi otyrysy Qazaqstan Respýblıkasynyń tóraǵalyǵymen ótýde. Qazaqstan TMD qurylǵan sátten bastap bizdiń elderimiz arasyndaǵy jan-jaqty yntymaqtastyqty jandandyrýdy, yntymaqtastyqty nyǵaıtý tabandy jaqtap keledi. Bul poseńestik keńistiktegi 11 memleketti biriktiretin, bizdiń óńirimizde balamasy joq biregeı ámbebap alań bolyp tabylady», - dedi QR Prezıdenti. Elbasy óz sózinde búgingi shara TMD-nyń damýyna óz úlesin qosyp, elder arasyndaǵy yntymaqtastyqty tereńdete túsýge óz úlesin qosatynyǵyna senim artatyndyǵyn basa aıtty. 

«Búgingi otyrystyń kún tártibine 17 másele qosylǵan. Olardyń basym bóligi qaýipsizdik pen quqyqtyq tártipti qamtamasyz etý máselelerine arnalǵan, halyqaralyq kelisimshart toptamalaryna qol qoıý, baǵdarlamalyq qujattardy bekitý, sonymen qatar Birikken Ulttar Uıymynyń qurylǵanyna 70 jyl tolýyna oraı jáne halyqaralyq lańkestikpen kúres týraly málimdeme bar», - dedi N.Nazarbaev.

Joǵary deńgeıdegi otyrysqa Armenıa Prezıdenti Serj Sargsán, Belarýs Prezıdenti Aleksandr Lýkashenko, Qyryzstan Prezıdenti Almazbek Atambaev, Reseı Prezıdenti Vladımır Pýtın, Ázerbaıjan Prezıdenti Ilham Álıev, Tájikstan Prezıdenti Emomalı Rahmon, Ózbekstan Prezıdenti Islam Kárimov, Moldova Syrtqy ister jne eýropalyq ıntegrasıa mınıstriniń orynbasary Andreı Galbýr, Túrkimenstan Mınıstrler Kabıneti Tóraǵasynyń orynbasary Satlyq Satlykov, Ýkraınanyń Qazaqstandaǵy isteriniń ýaqytsha senimdi ókili Iýrıı Lazebnık, TMD Atqarýshy komıtetiniń tóraǵasy - atqarýshy hatshysy Sergeı Lebedev qatysýda.