ALMATY. QazAqparat - Búgin Almatyda «Ǵylym ordasy» RMK kesheninde «Ortalyq Azıadaǵy tarıhnama jáne derekter: ótkeni, búgini jáne bolashaǵy týraly jańa zertteýler» atty Halyqaralyq semınar-praktıkým barysynda belgili shyǵystanýshy, Qazaqstanda Qytaıtaný ǵylymynyń negizin qalaýshylardyń biri, tarıh ǵylymdarynyń doktory Klara Hafızovanyń orys tilinde shyqqan «Dıalog sıvılızasıı na Shelkovom pýtı» jáne «Vostochnaıa dıplomatıa na styke sıvılızasıı» atty eki kitabynyń tanystyrylymy boldy.
«Batys órkenıeti tarapynan kóshpelilerdi jabaıy, basqynshy retinde berilgen túsinikten arylatyn kez keldi. Men bir kitabymda Ortalyq Azıa halyqtarynyń elshilikteri jóninde keste jasadym. Odan áskerı qaqtyǵystar men jaýlap alýshylyqtan kóri, elshilik baılanystardyń edáýir kóp bolǵanyn kórýge bolady. Óıtkeni, ulan-ǵaıyr dalany mekendegen kóshpeliler qaı kezeńde bolmasyn beıbit jaǵdaıda ómir súrýge, ózara saýda-sattyq jasaýǵa umtylǵan. Bul jerde Uly Jibek jolynyń orny erekshe. Onyń sımvoly da qurbany da - jylqy. Búkil órkenıetter baılanysy jylqynyń arqasynda júzege asty. Qytaı jibekti jylqyǵa aıybastaý úshin batys aımaqpen saýda-sattyq ornatty. Uly Jibek joly osydan bastaý alady. Ol kóne zamanda Jylqy joly atanǵan», - dedi Klara Hafızova.
Sonymen qatar, búgingi alqaly jıynda Qazaq KSR-nyń 1969 jyly Almatyda jaryq kórgen «XV-XVIII ǵasyrlardaǵy Qazaq handyǵynyń tarıhy týraly materıaldar (parsy jáne túrik shyǵarmalaryna alynǵan derekter)» jınaǵynyń tolyqtyrylyp qaıta basylyp shyǵarylǵan nusqasynyń tusaýkeseri ótti.
Usynylǵan jınaqtyń derektik negizin XV-XVIII ǵasyrlardaǵy tarıhty zertteý aıasyndaǵy parsy jáne túrki tilinen aýdarylǵan shyǵarmalar quraıdy.
Kitapty Astanadaǵy Halyqaralyq túrki akademıasy men Almatydaǵy Sh. Ýálıhanov atyndaǵy Tarıh jáne etnografıa ınstıtýty birlesip ázirlegen.
Derekkóz: QazAqparat
