Májilistiń jalpy otyrysynda Joǵary aýdıtorlyq palatanyń tóraǵasy Álıhan Smaıylov memlekettik holdıńterdiń aktıvterdi basqarý tıimdiligin qatań synǵa aldy. Onyń aıtýynsha, «Báıterek» ulttyq basqarýshy holdıńi men «Samuryq-Qazyna» ál-aýqat qory aktıvterdi utymsyz paıdalanyp otyr.
— Jekeshelendirýdiń 2021–2025 jyldarǵa arnalǵan keshendi josparyn iske asyrý qarqyny kúrt tómendedi. 2024 jyly nebári 14 nysan jekeshelendirilgen. Bul – óte tómen kórsetkish. Oń nátıje retinde respýblıkalyq búdjetten kvazımemlekettik sektordy qarjylandyrý kóleminiń 29%-ǵa qysqarǵanyn aıtýǵa bolady. Alaıda bul saladaǵy basqarý sapasy áli de alańdatarlyq deńgeıde, — dedi Smaıylov.
Palata tóraǵasy kvazımemlekettik sektordaǵy birneshe naqty olqylyqty da atady.
— «Báıterek» holdıńine qarasty kompanıalar jeńildikpen beriletin qarjylyq resýrstardy túpkilikti alýshylarǵa jetkizýdi tym keshiktirip otyr. Jobalardy irikteý kezinde ashyqtyq joq. Keı jaǵdaılarda KPI kórsetkishteri oryndalmasa da, qoldaý kórsetilgen. Al keı jobalarda qarsy mindettemeler múldem qarastyrylmaǵan, — dedi ol.
Smaıylovtyń málimdeýinshe, «Samuryq-Qazyna» qory jalpy quny 239 mlrd teńge bolatyn taý-ken, metalýrgıa jáne ónerkásip salalaryndaǵy 13 jobany toqtatyp tastaǵan. Bul ulttyq ekonomıkanyń strategıalyq sektorlaryna keri áser etýi múmkin.
Otyrysta Álıhan Smaıylov elimizde iri salyq tóleýshilerge júrgiziletin monıtorıńtiń júıesiz ekenin de atap ótti. Onyń aıtýynsha, bul salyqtyq baqylaýdyń tıimdiligin tómendetip, búdjet kirisin arttyrýǵa kedergi keltiredi.
