ALMATY. QazAqparat - El Prezıdenti Nursultan Nazarbaevtyń BUU 70 jyldyq mereıtoılyq sesıasynda kótergen bastamalary álemde qazirgi tańda ornaǵan tártipke aıtylǵan jaýap boldy. Osyndaı oıymen AQSH-ta issaparda júrgen saıasattanýshy Sanjar Boqaev bólisti.
Birqatar josparly kezdesý barysynda ol belgili sarapshylardyń oı-pikirimen  jeke tanysýǵa múmkindik aldy.

«Shyn máninde, Qazaqstan basshysynyń ıdeıalary Eýrazıa men Orta Azıa aımaǵyn zerttep júrgen sarapshylardyń arasynda úlken qyzyǵýshylyq týǵyzdy. Buǵan deıin de BUU modeliniń eskirgendigin kóp sarapshy aıtyp kelgen bolatyn. Nazarbaevtyń oılary barlyq uıymdy qaıta qalyptastyrý konteksinde olarǵa qyzyqty bolyp kórindi. Qazaqstan basshysynyń sózinen «Álemdi jańǵyrtý» týraly ańǵarǵan sarapshylar kóp boldy. Iaǵnı, onyń ıdeıasy qazirgi zamanda qalyptasqan álemdik tártipti ózgertý týraly boldy. BUU sarapshylary aımaqtyq qaqtyǵystardy ońtaıly sheshetin Qazaqstannyń BUU qaýipsizdik keńesine qatysýyn oń baǵalap otyr», - dedi S.Boqaev.

Aıta ketý kerek, qyrkúıektiń 29-ynda el prezıdenti Nursultan Nazarbaev BUU 70 jyldyq mereıtoıynda qazaq tilinde baıandama jasady. Óz sózinde ol 2045 jylǵa deıingi jahandyq damý josparyn qurýdy usyndy.

Sondaı-aq, Elbasy BUU Bas Assambleıasynyń 70-shi sesıasynyń trıbýnasynan ulttyq álemdik valútanyń qurylýy men terorızmge qarsy kúrestiń biryńǵaı álemdik jelisin qurý máselelerin tilge tıek etti.

N.Nazarbaev jahandyq daǵdaryspen kúresti qazirgi kezde zańdylyq, demokratıalyq, básekelestik, tıimdilik jáne halyqaralyq baqylaý ustanymdaryna saı kelmeı otyrǵan emısıa men álemniń rezervtik valútalary aınalymyn retteýden bastaý qajet ekendigin atap ótti.