ALMATY. QazAqparat - Almatyda búgin Oqýshylar saraıynda muǵalimder kúnine oraı qala ákimi Baýyrjan Baıbektiń qatysýymen konferensıa ótti. Onlaın rejimde ótken jıynǵa qalanyń 201 mektebiniń ujymy qatysty.

Qala ákimi Baýyrjan Baıbektiń aıtýynsha, qalanyń bilim berý júıesinde qazir 27 myńnan astam ustaz eńbek etip júr. Olardyń ishinde 1000-ǵa jýyq muǵalim Altynsarın atyndaǵy tósbelgi men QR Bilim berý isiniń úzdigi medaliniń ıegeri. Al 13 muǵalim Qazaqstan Respýblıkasynyń eńbek sińirgen qaıratkeri ataǵyn alǵan.

«Elimizde bilim berý salasynyń damýyna barynsha jaǵdaı jasalyp jatyr. Elbasy Nursultan Nazarbaevtyń tapsyrmasymen Bilim berý baǵdarlamasy júzege asyp keledi. Memleket basshysy muǵalimderdiń materıaldyq ahýalyna da kóp mán berip keledi. 2016 jyldan bastap muǵalimderdiń jalaqysy 44 paıyzǵa kóteriledi. Sońǵy 3 jylda qalanyń bilim berý salasyna bólinetin qarjy 20 paıyzǵa artty. Bıyl bul soma 54,5 mlrd teńgeni qurady. Sońǵy 5 jylda qalada 46 bilim berý nysany boı kóterdi. El bolashaǵynyń kilti búgingi jastarda. Óz kezeginde jas urpaq boıyna bilim ǵana emes, izgilik nuryn seýip otyrǵan sizderge osy onlaın-konferensıa arqyly alǵysymdy bildirgim keledi», - dedi Baýyrjan Baıbek jıyn barysynda.

Óz sózinde qala basshysy bıyl 1500 pedagog 150-300 myń kóleminde bir rettik syıaqy alǵandyǵyn jetkizdi. Osy baǵytta qala búdjetinen 320 mln teńge qarastyrylǵan.

Qala basshysy muǵalimderdi yntalandyrýdyń ujymdyq úlgisin usyndy.

«Eń úzdik mektepterdi marapattaýdy usynamyn. Iaǵnı, eger mekteptiń ujymy qandaı da bir jetistikke jetse, sol mekteptiń ujymynyń arasynda qala búdjetinen bólingen 320 mln teńgeni jalaqysyna koefısıent retinde eseptep berý kerek. Eger, qosymsha qarjylandyrý kerek bolsa, biz ony da qarastyryp kóremiz. Ol basqa mektepterge úlgi bolady. Nege ol mektep úzdik boldy? Qandaı jetistigi bar? Soǵan basqalary da umtylatyn bolady», - dedi B.Baıbek.

№178 fızıka-matematıkalyq lıseı men kóp profıldi kolej stýdentteri onlaın rejimde baılanysqa shyǵyp, óz pikirleri men quttyqtaýlaryn jetkizdi.