ASTANA. QazAqparat - Búgin Aqmola oblysynyń Býrabaı aýdandyq sotynda memlekettiń ekonomıkalyq qaýipsizdigi men ekonomıkalyq qyzmet salasyndaǵy qylmystar máselelerin talqylaýǵa arnalǵan halyqaralyq konferensıa óz jumysyn qorytyndylady.
Forým jumysyn qoryta kele, QR Joǵarǵy Sotynyń qylmystyq ister jónindegi qadaǵalaýshy sot alqasynyń tóraǵasy Abaı Rahmetýlın memlekettiń ekonomıkalyq qaýipsizdigi - quqyqtyq jáne uıymdastyrýshylyq quraldaryn, sonyń ishinde qylmystyq-quqyqtyq sharalar keshenin qamtamasyz etetin ulttyq qaýipsizdiktiń mańyzdy bóligi bolyp tabylatyndyǵyn atap ótti.
Kásipkerlerdiń quqyqtary men múddelerin qorǵaý - Memleket basshysy jarıalaǵan «100 naqty qadam» Ult josparyn iske asyrý aıasyndaǵy memlekettik saıasat basymdyqtarynyń biri. Qarjylyq sot qurý, Joǵarǵy Sotta ınvestısıalyq daýlardy qaraıtyn mamandandyrylǵan alqa jáne Joǵarǵy Sot janynda ekonomıkalyq daýlar boıynsha sarapshylyq-tájirıbelik pikir almasý úshin sheteldik sýdıalar men zańgerlerden quralǵan Halyqaralyq keńes qurý - memlekettiń ekonomıkalyq qaýipsizdigin nyǵaıtýǵa jáne kásipkerler men ınvestorlardyń quqyqtaryn tıimdi qorǵaýǵa baǵyttalǵan naqty is-qımyl bolyp tabylady.
Talqylaý sheńberinde memlekettik organdardyń, úkimettik emes uıymdar men bıznes qaýymdastyq ókilderiniń ekonomıkalyq saladaǵy quqyq buzýshylyqtardy tergeý jáne jaza taǵaıyndaý máseleleri boıynsha kezdesetin uıymdastyrýshylyq, quqyqtyq aqtańdaqtar, sonyń ishinde salyq salý jáne memlekettik satyp alý salasyndaǵy quqyq buzýshylyqtar, ekonomıka salasyndaǵy qylmystyq áreketterdiń jekelegen quramdaryn odan ári dekrımınalızasıalaý týraly ustanymdary tyńdaldy.
Abaı Rahmetýlın Qazaqstanda sońǵy 5 jyl kóleminde ekonomıkalyq qyzmet salasyndaǵy qylmystardy dekrımınızasıalaýdyń birneshe kezeńi júzege asyrylǵandyǵyn atap ótti. Nátıjesinde jańa Qylmystyq kodekste ekonomıkalyq qylmystar quramynyń basym bóliginiń, shamamen 70 paıyzynyń sanksıasy bas bostandyǵynan aıyrýdyń balamaly jazasy retinde aıyppuldardyń aıtarlyqtaı kólemin, túzeý jumystaryn jáne bas bostandyǵynan shekteýdi kózdeıdi.
Konferensıa jumysynyń sońynda qatysýshylar Reseı men Germanıadan kelgen ǵalymdar men sarapshylardyń, sot qaýymdastyǵy, quqyq qorǵaý organdary men úkimettik emes uıymdar ókilderiniń aıtqan oı-pikirlerin talqylaı kele, sot-tergeý tájirıbesin odan ári jetildirýge, jeke jáne zańdy tulǵalardyń quqyqtary men zańdy múddelerin tıimdi qorǵaýǵa baǵyttalǵan usynymdardy ázirledi.
