ALMATY. QazAqpart - Almatyda Qazaq handyǵynyń 550 jyldyǵyna oraı uıymdastyrylǵan respýblıkalyq «Uly dala eli» tarıhı-mádenı ekspedısıasy boıynsha arnaıy kúndelik kitap shyǵarylady. Bul týraly búgin Almatyda ótken «Jer tarıhy -el tarıhy» atty dóńgelek ústel barysynda Almaty qalalyq Qazaqstan halqy Assambleıasy tóraǵasynyń orynbasary, Osetın etnomádenı birlestiginiń tóraǵasy Qazbek Mamsýrov málimdedi.
«Elimizde Qazaqstan halqy Asambleıasynyń uıytqy bolýymen «Uly dala eli» atty ekspedısıa uıymdastyrylǵan bolatyn. Ol 11-shi qyrkúıekte elimizdiń shyǵysynda, soltústiginde, batysynda jáne ortalyq óńirinde bastaý aldy. Mundaı shara Almatyda da júzege asyryldy. Almaty qalalyq Qazaqstan halqy Assambleıasynyń músheleri, joǵary oqý oryndarynyń stýdentteri, arheologtar jáne tarıhshylardan quralǵan ekspedısıa Almaty qalasy men Almaty oblysynda kóptegen tarıhı eskertkishterdi aralady.
Solardyń ishinde jońǵarlarǵa qarsy kúreste erligimen tanylǵan Raıymbek, Naýryzbaı jáne basqa da qazaq batyrlarynyń eskerktishterin kórdik. Sonymen qatar, Almatynyń irgesinde ornalasqan Boraldaı saq jáne úısin qorǵandary keshenine bardyq. Bul biz úshin óte qyzyqty boldy. Qazaq halqynyń tarıhynan kóptegen málimetterge qanyqtyq. Bul biz úshin, jas urpaq úshin óte mańyzdy shara. Endi tarıhshylardyń, arheologtardyń jáne basqa da mamandardyń qazaq halqynyń tarıhy boıynsha jasaǵan dáristeri negizinde arnaıy kúndelik kitap shyǵarylady», - dedi óz sózinde Q. Mamsýrov.
