Qaraǵandyda turǵyn úı-kommýnaldyq sharýashylyqty bir jerden basqarýǵa arnalǵan biryńǵaı dıspecherlik ortalyq qurý jospary jarıa etildi. Qyzmet sapasyn ashyq etip, jedel áreket etýge jol ashatyn joba óńirlik deńgeıde alǵashqylardyń biri bolmaq.

Jospar jaıyn Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev oblysqa saparynda tyńdady. Vıse-premer jergilikti kásiporyndardyń jumysymen tanysyp, İT-ónerkásipti damytý men jasandy ıntellektti ekonomıka jáne basqarý júıesine engizý máselesin talqylady.

Komýnaldyq qyzmetti «bir ekrannan» kórý

KAZPROM AVTOMATIKA kompanıasy qalaǵa ortaq dıspecherlik ortalyq qurýdy usyndy. Sý, jylý, kóshe jaryǵy sıaqty qyzmetterdi derektermen basqarýdy kompanıa 20 jyldan astam tájirıbege súıenip usyndy. Maqsat – tutyný men jetkizýdi ońtaılandyryp, kórsetkishterdi qyzmet kórsetýshiler men ákimdikke tolyq ashyq etý.

«Alǵashqy kezeńde TÚKSH qyzmetiniń tutynýyn jáne jetkizilýin ońtaılandyrýdy josparlap otyrmyz. Sý, jylý, kóshe jaryǵy sekildi kúndelikti ómirge tikeleı áser etetin baǵyttardy biryńǵaı baqylaýǵa biriktiremiz», – dedi tehnıkalyq dırektor Dmıtrıı Lepehov.

Pılottyq joba Ybyraı Altynsarın atyndaǵy mektep-lıseı bazasynda iske qosylmaq. Tıimdiligi dáleldense, qalalyq ınfraqurylymǵa kezeń-kezeń engizilýi múmkin.

«Pılot nátıje berse, jobany respýblıka boıynsha masshtabtaımyz. Salaǵa jaýapty mınıstrlikpen barlyq detaldy pysyqtaý qajet», – dedi Jaslan Mádıev.

Mektepten İT-ke: jańa formattaǵy oqý

Vıse-premer İT-mektep ashylatyn alańǵa bardy. Munda oqý klasıkalyq leksıasyz jáne muǵalimsiz, «teń teńdi oqytady» qaǵıdatymen, jobalyq jumys pen geımıfıkasıaǵa súıenip júredi. Maqsat – naryq suranysyna saı baǵdarlamalaý men zamanaýı sıfrlyq daǵdylardy meńgertýdi jolǵa qoıý.

Bir tereze qaǵıdatymen jumys isteıtin Memlekettik jáne servıs qyzmetteri ortalyǵynda shamamen 20 mekeme qyzmet kórsetip otyr. Sol jerde 12–18 jas aralyǵyndaǵy oqýshylarǵa arnalǵan TUMO Center ashý jospary tanystyryldy. Jasóspirimder generatıvti JI, baǵdarlamalaý, anımasıa, 3D-modeldeý jáne robototehnıka baǵyttaryn tegin oqı alady. Joba Astana Hub-pen birlesip iske asady, alǵashqy ortalyq Astanada jumys istep tur.

Qaýipsiz qalaǵa – otandyq sheshimder

Mınıstr «Perspektıva» ǵylymı-óndiristik birlestiginiń qyzmetimen de tanysty. Kompanıa beınebaqylaý, vıdeoanalıtıka jáne qaýipsizdik boıynsha baǵdarlamalyq-apparattyq sheshimder ázirlep keledi. «Qaýipsiz qala», «Sıfrlyq polıseı», «Aqyldy qala», «Sıfrlyq ýchaskelik», Ulttyq beınemonıtorıng júıesi jáne «Qaýipsiz mektep» sekildi jobalarǵa kompanıa qatysyp otyr.

Insıdentke jedel jaýap beretin ortalyq

Sapar sońynda qoǵamdyq qyzmetterdiń sapasyn kóterip, tótenshe jaǵdaılarǵa jedel áreket etýge arnalǵan Biryńǵaı úılestirý ortalyǵy kórsetildi. Osyndaı arhıtektýra TÚKSH dıspecherlik ortalyǵymen túıisip, qala ınfraqurylymyn keshendi basqarýǵa múmkindik berýi tıis.

Óńirdiń baǵyty: JI arqyly tıimdilik arttyrý

Qaraǵandy oblysynyń ákimi Ermaǵanbet Bólekpaev óńirde sıfrlyq transformasıany júıeli túrde ilgeriletip jatqanyn aıtty. «Prezıdent Joldaýynda jasandy ıntellekt negizinde Qazaqstandy sıfrlyq elge aınaldyrý mindeti qoıyldy. Biz ekonomıka men basqarý júıesine tıimdi ıntellektýal ónimderdi keńinen engizýdi kózdep otyrmyz. Oblysta Sıfrlyq transformasıa kartasy men «Aqyldy qalalar» strategıasy bekitildi. Biz II-agentterdi kóbeıtýge emes, ólshenetin nátıje beretin neırojeliler men analıtıkalyq modelderdi tájirıbelik deńgeıde qoldanýǵa basymdyq berip otyrmyz», – dedi óńir basshysy.

Qaraǵandy usynylǵan dıspecherlik ortalyqty birinshi bolyp iske qossa, jobany basqa qalalar úshin úlgi etý jáne el kóleminde taratý múmkindigi arta túspek.

Bul týraly Qamshy.kz aqparat agenttigi habarlaıdy.