TARAZ. QazAqparat - Tarazdaǵy Qazaq handyǵynyń 550 jyldyǵyn toılaýǵa arnalǵan mádenı-buqaralyq sharalardyń aýqymdy baǵdarlamasy ázirlendi.  
«Daıyndalǵan sharalardyń barlyǵyn aıtsam, onda qyzyqsyz bolyp qalady, - dedi baspasóz-konferensıasynda Jambyl oblysy ákiminiń orynbasary Erqanat Mánjýov. - Qala turǵyndary men qonaqtaryn mádenı-buqaralyq sharalardyń aýqymdy baǵdarlamasy kútip tur. Mereke qurmetine ondaǵan shara josparlandy. Máselen, Tuńǵysh Prezıdent saıabaǵynda kóshpendiler órkenıetiniń tarıhyn kórsetedi».

«Tuńǵysh Prezıdent saıabaǵynda eki kún ishinde «Qazaq álemi» tarıhı-etnografıalyq kesheni uıymdastyrylmaq. Onda dala bıleýshileri men kóshpendilerdiń ómirindegi bólshekterden turatyn birqatar kompozısıa qoıylady. Qolóner buıymdarynyń, kóne alasha, qarý, zergerlik buıymdardyń kórmeleri,  kóne semserlermen jekpe-jek uıymdastyrylady, kıiz úıler turǵyzylady», - dedi   E. Mánjýov.

«Uly Jibek joly» etnofestıvalderi, «Dostyq» etnoqalashyǵy, ulttyq oıyndar boıynsha jarystar, qazaqtyń kıiz úıleriniń, kóshpendilerdiń qarý-jaraǵynyń tarıhy men túrleri boıynsha tanymdyq baǵdarlamalar,   «Arlan» «Saqtardan qazaqtarǵa deıin» kostúmder teatrynyń tarıhı shoýy ótedi.

 «Aq Shatyr» sahnasynda 9 qazanda «Máńgilik saryn» Memlekettik akademıalyq sımfonıkalyq orkestri, «Ǵasyrlar sazy» fólklorlyq-etnografıalyq ansambli, «Turan» etno-folklorlyq ansambli, «Qońyr» etno-tobynyń baǵdarlamalaryn tamashalaýǵa bolady.  

«8 qazanda Tuńǵysh Prezıdent saıabaǵynda  qytaılyq Sıan qalasynan Uly Jibek Joly boıymen kele jatqan kerýen ekspedısıasyn qarsy alady», - dep atap ótti E. Mánjýov.

Sonymen qatar, «Qazaq handyǵy» monýmentiniń saltanatty ashylýy ótedi, Almaty qalasynyń, Qyzylorda, Ońtústik Qazaqstan jáne  Almaty oblystarynyń merekelik konserttik baǵdarlamalary bastalady. Bul kúni «Kóne Taraz» murajaıy ashylyp, Qazaq handyǵynyń 550 jyldyǵyna arnalǵan kitaptar tanystyrylady. «Balasaǵun» OKZ-da 2 kúndik aıtys ótedi. Onda  Qazaqstan, Mońǵolıa, Qytaı jáne Ózbekstannyń 14 jup aqyny kezdesedi.

M.Áýezov atyndaǵy almatylyq teatr men jergilikti teatr trýppalary tarıhı qoıylymdar qoıady. 

Taraza ıpodromynda jylqy polosy oıynynyń tanystyrylymyn ótkizý josparlandy.  «Atshabar» jylqy-sporttyq kesheninde jylqy sportynyń jarystary ótedi.

9 qazanda  «Taraz - Arena» Sport saraıynda QR Prezıdentiniń syılyǵyna qazaq kúresi boıynsha «Eýrazıa Barysy» halyqaralyq týrnıri ótedi.

Mereıtoılyq sharalar teatrlandyrylǵan qoıylym men Ortalyq  stadıondaǵy merekelik gala-konsertpen aıaqtalady.

Eske sala keteıik, Qazaq handyǵynyń 550 jyldyǵyn toılaý bıyl eldiń barlyq aımaǵynda ótýde. Negizgi sharalar 550 jyl buryn Talas pen Shý ózenderi arasynda Kereı men Jánibek handar Qazaq handyǵyn qurǵan Jambyl oblysynda ótedi.