ORAL. QazAqparat - 1 qazan kúni Jáńgir han atyndaǵy Batys Qazaqstan agrarlyq-tehnıkalyq ýnıversıtetinde «Ýnıversıtet jáne sheteldik kompanıalar: áriptestik jáne múmkindikter, perspektıvalyq damý» taqyrybynda forým ótkizildi.
Forýmǵa qatysqan oblys ákiminiń orynbasary Narıman Tóreǵalıevtiń atap ótkenindeı, Elbasynyń «100 naqty qadam» ult josparyn júzege asyrý úshin básekege qabiletti mamandar daıarlaýdyń mańyzy zor. Bul rette joǵary oqý oryndary jumys berýshilermen, sonyń ishinde sheteldik kompanıalarmen áleýmettik áriptestikti damyta bilýi qajet.
Jıynda «Kaspıan Prodjer Injınırıń end Kansaltıng» JSHS bas dırektory Krıshı Nıno Gaıtano batysqazaqstandyq ýnıversıtetpen kadrlar daıarlaýdaǵy baılanysy jóninde áńgimelese, Jáńgir han atyndaǵy BQATÝ-dyń bıylǵy túlekteri Málıka Saýdasheva, Nurlybek Aıanov jáne basqalar atalǵan kompanıanyń qoldaýymen Italıada joǵary bilikti mamandardan dáris alyp, tájirıbeden ótkendigin jetkizdi. Bolashaqta osyndaı kompanıalardyń quramynda jumys jasaýǵa yqylasty ekendikterin jasyrǵan joq. Budan bir jyl buryn batysqazaqstandyq ýnıversıtet pen «Kaspıan Prodjer Injınırıń end Kansaltıng» JSHS arasynda yntymaqtastyq jónindegi memorandýmǵa qol qoıylǵan bolatyn. Forýmda yntymaqtastyqtyń bir jylǵy alǵashqy nátıjeleri jarıa etilip, mundaı jumystardyń aldaǵy ýaqytta jalǵasatyny aıtyldy. Jalpy, Jáńgir han atyndaǵy BQATÝ 23 sheteldik kompanıamen ózara tıimdi baılanys jasaý maqsatynda memorandýmǵa qol qoıǵan.
Forým sońynda JOO stýdentterin qazirgi eńbek naryǵyna jan-jaqty daıarlaýdy jetildirý baǵytynda usynba qabyldanyp, Proger S.p.A Italıa kompanıasynyń atqarýshy vıse-prezıdenti Mıkelandjelo Tortorella men «Kaspıan Prodjer Injınırıń end Kansaltıng» JSHS bas dırektory Krıshı Nıno Gaıtanoǵa ýnıversıtettiń qurmetti profesory ataǵy berildi.
«Memleket basshysynyń «Nurly jol - bolashaqqa barar jol» atty Joldaýynda elimizdi odan ári ındýstrıalandyrý, ekonomıkamyzdy damytý baǵytynda bilikti jas mamandar daıarlaý qajettigi atap kórsetilgen bolatyn. Búgingi tańda ár joǵary oqý orny jastarǵa bilim berip qana qoımaı, olardyń básekege qabiletti bolyp, ózderi nıet etken kásiporyndarǵa ornalasýyna kúsh salýy qajet. Bul úshin, árıne, osyndaı naqty ister atqarylýy kerek», dedi ýnıversıtet rektory Nurlan Serǵalıev
