ALMATY. QazAqparat - Búgin Almatyda «Qaırat» fýtbol klýbynyń álemdik standarttarǵa saı etip salynǵan negizgi jattyǵý bazasynyń saltanatty ashylý rásimi ótti.
«Fýtboldy damytý úshin oǵan tıisti ınfraqurylym, ádisteme jáne naqty damý jospary kerek. Biz «Qaırat» klýbynda olardyń bar ekendigin kórip turmyz. Men kóp uzamaı fýtbolshylarymyz álemniń eń tanymal fýtbol birinshilikterinde óner kórsetedi dep senemin», -dedi saltanatty rásimde Almaty ákimi Baýyrjan Baıbek.
Sonymen qatar qala basshysy buqaralyq sportty damytý - ultyń saýlyǵyna tikeleı yqpal etetindigin aıtty.
«Memleketimiz bul salaǵa úlken mán beredi. Sondyqtan da elimizde iri-iri halyqaralyq jarystar ótkizilip, halyqaralyq standarttarǵa saı sport nysandary salynyp jatyr. Jarystardan basqa ýaqyttarda olarda qala turǵyndaryna arnalǵan sporttyq jáne mádenı sharalar ótip turady. Al myna baza jeke bıznesmenderdiń demeýshiligimen salynǵan. Olar osylaısha elimizde sporttyń damýyna óz úlesterin qosyp jatyr», - dedi ol.
Óz sózinde klýb ujymyn quttyqtaı otyryp, QR Mádenıet jáne sport mınıstriniń Sport jáne dene shynyqtyrý isteri jónindegi komıtetiniń tóraǵasy Elsıar Qanaǵatov fýtboldyń Qazaqstanda tanymal oıyndardyń biri ekendigin jáne onyń buqaralyq sportty damytý erekshe oryn alatyndyǵyn atap kórsetti.
Al jattyǵý bazasyna keler bolsaq, munda tabıǵı kógaldan jasalǵan úsh fýtbol alańy jáne jasandy kógaldan jasalǵan eki fýtbol alańy bar. Olardyń biri jabyq túrde jasalǵan. Sonymen qatar, munda aýmaǵy 9,5 myń sharshy metr bolatyn ákimshilik ǵımarat salynǵan.
«Biz qurylystyń aıaqtalyp, bazanyń qoldanysqa berilgenin maqtan etemiz. Budan tórt jyl buryn mundaı «baza salamyz» degen ıdeıaǵa eshkim senbep edi. Minekı, búgin biz fýtbol ardagerlerine bergen ýádemizdi oryndadyq. Biz osy nysanmen klýbtyń ınfraqurylymdaryn qurý kezeńin tolyq aıaqtadyq. Endi bizde bul bazamen qatar, balalarǵa arnalǵan úsh fýtbol akademıasy jáne jasóspirimderge arnalǵan bir mektep-ınternat jumys isteıdi» - dedi óz sózinde «Qaırat» fýtbol klýbynyń Qadaǵalaýshy keńesiniń tóraǵasy Qaırat Boranbaev.
Onyń aıtýynsha, bazanyń qurylysy men árleý jumystaryna Qazaqstanda jasalǵan tabıǵı materıaldar qoldanylǵan. Jattyǵý kesheni 12 gektar jerdi alyp jatyr.
«Bul jerde, ásirese alańdarǵa kóp kóńil bólindi. Bul jumystardy ıtalándyq jáne shotlandyq kompanıalardyń mamandary atqardy. Eki alań jylytý júıesimen qamtamasyz etilgen. Al jasandy alań bambýk ósimdiginen jasalǵan. Munda «Qaırat» komandasynyń 22 oıynshydan turatyn negizgi jáne qosalqy quramy jattyǵatyn bolady», -dedi Q. Boranbaev.
Aıta ketelik, saltanatty sharaǵa elimizdiń fýtbol salasynyń ókilderi jáne «Qaırat» komandasynyń ardagerleri qatysty.
