TALDYQORǴAN. QazAqparat - Búgin Taldyqorǵan qalasynyń İ.Jansúgirov atyndaǵy Mádenıet úıinde «Eńbek kúni» merekesine oraılastyrylǵan aýqymdy shara ótti.
Qarapaıym jumysshylardyń eńbegin baǵalaý, olarǵa qurmet kórsetý maqsatynda ótkizilgen osynaý shara barysynda óz isiniń naǵyz mamany bolǵan, oblystyń áleýmettik-ekonomıkalyq damýyna eleýli úles qosqan eńbek maıtalmandary ulyqtaldy.
Oblys ákimi Amandyq Batalov óńir ekonomıkasynyń berik irgetasyn qalap, artynan ornyn basar senimdi de laıyqty urpaq ósirgendigi úshin zalda jınalǵan eńbek ardagerlerine alǵysyn bildirdi. - Barshańyzdy «Eńbek kúni» kásibı merekesimen shyn júrekten quttyqtaımyn! Aınalamyzdaǵy bizdi qorshaǵannyń barlyǵy - kúndelikti, keı kezderi kózge kórinbeıtin, biraqta mańyzdy jumystardyń nátıjesi.
Bizdiń qazirgi qol jetkizgen jetistikterimiz - baspaldaq ispetti. Onyń árbir baspaldaǵy qurylysshy, ustaz, dáriger, ǵalym, aspazshy, saqshy, eginshi, qarapaıym jumysshynyń eńbegimen, onyń mańdaı terimen quralatyndaı.
Búgingi mereke halyq pen memleket ıgiligine eńbegin sińirip júrgen azamattarǵa úlken alǵys, syı-qurmet kórsetýdiń múmkindigi, - dep atap ótti Amandyq Batalov.
Sondaı-aq mereke aıasynda sóz alǵan Sosıalısik Eńbek Erleri Kúlásh Aıtjanova men Anatolıı Rábın, Elbasynyń syndarly saıasatynyń arqasynda osyndaı jetistikterge jetkendigimizdi, eńbek etemin deýshi árbir azamatqa barlyq jaǵdaı jasalǵandyǵyn aıtty. «Eń bastysy qaı salada bolmasyn tabysty jáne qajyrly eńbek etý qajet.
Bizdiń júrip ótken eńbek jolymyz, eńbekke degen súıispenshiligimiz ben qulshynysymyz keıingi urpaqqa úlgi bolsa, Bizdiń basty maqsatymyzdyń oryndalǵandyǵy», - dedi Sosıalısik Eńbek Erleri.
Osy kúni oblystyń ósip-órkendeýine erekshe eńbegin sińirgen azamattardyń eńbek jolyn baıandaıtyn beınefılmder men sahnalyq qoıylymdar kórsetilip, ár salada jemisti eńbek etken Almaty oblysynyń turǵyndary men eńbek qyzmetinde joǵary kórsetkishterge qol jetkizgen mamandaryn marapattaý rásimi, sondaı-aq jınalǵan kópshilik nazaryna Súıinbaı atyndaǵy oblystyq fılarmonıa ujymynyń merekelik konserttik baǵdarlamasy usynyldy, dep habarlady óńir basshysynyń baspasóz qyzmeti.
