Qazaq tilin oqytýǵa arnalǵan Steppe Rider oıynynyń quny qoǵamda talqylaý týǵyzdy. Jobanyń qymbat bolýyn Ǵylym jáne joǵary bilim mınıstrligi birneshe faktorǵa baılanystyryp otyr.

Mınıstrlikke qarasty Til saıasaty komıtetiniń tóraǵasy Erbol Tleshev Ortalyq komýnıkasıalar qyzmetindegi brıfıńte Steppe Rider oıyny birden úsh platformaǵa arnap ázirlengenin aıtty. Sonymen qatar joba tek jasaýmen shektelmeı, keıingi tehnıkalyq qoldaý men jańartýlardy da qamtıdy.

Memlekettik satyp alýlar portalyndaǵy derekke sáıkes, oıynǵa búdjetten 241 838 392 teńge bólingen. Ulttyq banktiń 22 qańtardaǵy baǵamy boıynsha bul shamamen 477 myń AQSH dollaryna teń.

Komıtet tóraǵasynyń aıtýynsha, Steppe Rider – qazaq tilin úıretýge baǵyttalǵan otandyq alǵashqy runner janryndaǵy oıyn. Bul joba til saıasatyn damytý tujyrymdamasy aıasynda iske asyrylǵan.

Erbol Tleshevtiń sózinshe, mundaı jobalardyń baǵasyn salystyrǵanda platformalar sanyn eskerý qajet. Onyń aıtýynsha, naryqta bir platformaǵa arnalǵan osyndaı oıyndardyń quny 1 myń dollardan 300 myń dollarǵa deıin jetýi múmkin.

Mınıstrlik oıynnyń quny tehnıkalyq kúrdelilik pen kópplatformaly formatqa baılanysty qalyptasqanyn atap ótti.