Almaty oblysynyń Raıymbek aýdanynda ótken óńirdiń 90 jyldyǵyna arnalǵan «Hantáńiri qazynasy» halyqaralyq etnofestıvali ulttyq mádenıetti ulyqtaýmen qatar, «Taza Qazaqstan» respýblıkalyq ekologıalyq aksıasynyń negizgi alańdarynyń birine aınaldy. Úsh kúnge sozylǵan mereıtoıǵa 25 myńnan astam adam qatysyp, tabıǵatty qorǵaý men ekologıalyq mádenıetti hqalyptastyrýǵa baǵyttalǵan is-sharalarǵa belsendi atsalysty.
Festıvál ótetin aýmaqta tazalyqty qamtamasyz etý úshin 105 bıodárethana men 75 qoqys konteıneri ornatylyp, 3 arnaıy tehnıka jumyldyryldy. Ekologıalyq aksıaǵa 110 erikti, jergilikti turǵyndar men jastar belsendi qatysty. Tazalyq jumystaryna 1000 qap pen 1000 jup qolǵap paıdalanylyp, nátıjesinde shamamen 7 tonna qatty turmystyq qaldyq jınalyp, arnaıy polıgonǵa shyǵaryldy.
Sonymen qatar jalpy aýmaǵy 116 480 sharshy metrdi qamtıtyn jerde 20 aqparattyq banner ornalastyryldy. Tuzkól aýylynan festıvál ótetin Shalkóde jaılaýyna deıingi 28 shaqyrym jol boıyna ár bes shaqyrym saıyn qoqys konteınerleri qoıylyp, kelýshilerge qolaıly jaǵdaı jasaldy. Uıymdastyrýshylardyń aıtýynsha, bul sharalar tabıǵı aýmaqtyń tazalyǵyn saqtaýǵa jáne kópshilik arasynda jaýapty ekologıalyq mádenıetti qalyptastyrýǵa múmkindik berdi.
«Taza Qazaqstan» aksıasymen ushtasqan halyqaralyq etnofestıvalge Qazaqstannyń túkpir-túkpirinen jáne shetelden myńdaǵan qonaq qatysty. Shalkóde jaılaýynda 150-ge jýyq aqshańqan kıiz úı tigilip, qolóner, etnodızaın, beıneleý óneri, ulttyq taǵamdar men aýyl sharýashylyǵy ónimderiniń kórmeleri uıymdastyryldy. Qazaqstandyq sheberlermen birge Qytaı, Túrkıa, Reseı, Ázerbaıjan, Qyrǵyzstan, Tájikstan, Belarýs, Armenıa, Ózbekstan jáne Grýzıadan kelgen qolónershiler óz týyndylaryn tanystyrdy.
Baǵdarlama aıasynda ulttyq sport jarystary, tarıhı-tanymdyq kórmeler, etnoaýyldar men mádenı is-sharalar ótti. Kópshiliktiń erekshe yqylasyna bólengen «Qarqaraly» jaılaý kóshi qazaqtyń kóshpeli órkenıetin keńinen nasıhattady.
Festıváldiń ashylý saltanatyna Qazaqstan Respýblıkasy Prezıdentiniń keńesshisi Málik Otarbaev qatysyp, Memleket basshysy Qasym-Jomart Toqaevtyń quttyqtaýyn jetkizdi.
Almaty oblysynyń ákimi Marat Sultanǵazıev óz sózinde Raıymbek aýdanynyń tarıhı-mádenı murasy men týrısik áleýetine toqtalyp, óńirdiń qazaq rýhanıatyndaǵy aıryqsha ornyn atap ótti.
Úsh kúndik mereıtoı aıasynda Qarasaz aýylynda Orazaly Dosbosynovty eske alýǵa arnalǵan II respýblıkalyq oqýshylar aıtysy, Narynqolda Muqaǵalı Maqataev shyǵarmashylyǵyna arnalǵan ǵylymı-tanymdyq konferensıa jáne aýdan ortalyǵynda gala-konsert uıymdastyryldy. Merekelik sharalar Shalkóde jaılaýyndaǵy «Jolan júırigi» respýblıkalyq at báıgesimen jáne ulttyq sport jarystarymen qorytyndylandy.
Osylaısha, Raıymbek aýdanynda ótken «Hantáńiri qazynasy» halyqaralyq etnofestıvali ulttyq mádenıetti dáripteýmen qatar, «Taza Qazaqstan» bastamasynyń naqty nátıjesin kórsetken ekologıalyq jaýapkershiliktiń jarqyn úlgisine aınaldy.
