«Órleý» biliktilikti arttyrý ulttyq ortalyǵy oblystyq fılıaly Sankt-Peterbýrgtegi Dıplomnan keıingi pedagogıkalyq bilim akademıasymen birigip «Bilim berý ortasy jáne psıhologıalyq qaýipsizdik» atty halyqaralyq ǵylymı-tájirıbelik konferensıa ótkizdi.
Onda oqytý jáne tárbıeleý úderisinde bala qaýipsizdigin qam­tamasyz etý, qoqan-loqy, kúsh kórsetýden saqtandyrý, sapaly bilim, sanaly tárbıe alýǵa qolaıly jaǵ­daılar jasaý taqyryptary boıynsha talqylaýlar uıymdastyrylyp, is-tájirıbeler tanystyryldy. Zamanaýı teorıalyq jáne praktıkalyq kózqaras, ómirlik qıyn jaǵdaılarda balalarǵa ádistemelik kómekter berý, arnaıy bilim alý jáne ınternat uıymdarynda psıhologıalyq ahýal ornyqtyrý máseleleri úlken qyzyǵýshylyq týdyrdy. Alqaly jıynǵa AQSH, Reseı, Ýkraına, Grýzıa, Ózbekstan, Qazaqstan, taǵy basqa elderden 200-ge jýyq baıandamanyń túsýi, olardyń arasynda 19 ǵylym doktory men kandıdattyń bolýy kún tártibine usynylǵan máselelerdiń aýqymdylyǵyn ańǵartsa kerek.
Plenarlyq otyrysta Qorǵan oblysy bilim berýdi damytý jáne áleýmettik tehnologıalar ınstıtýtynyń mektepke deıingi jáne bastaýysh jalpy bilim berý kafedrasynyń meńgerýshisi, psı­hologıa ǵylymdarynyń kandıdaty Elena Alfeeva, Reseı halyq sharýashylyǵy akademıasynyń (Sankt-Peterbýrg qalasy) qoǵam­men baılanys kafedrasynyń do­senti, sertıfıkattalǵan geshtalt-terapevt Anna Sosnovskaıa, Ós­­­kemen medısınalyq kol­led­­­jiniń oqytýshysy, pedagogı­ka ǵy­­lymdarynyń magıstri Ba­qyt Seıl­hanova bilim sapasyn halyq­aralyq standarttarǵa sáı­kes­tendirý jaǵdaıynda kolej stýdentterine psıhologıalyq qoldaý kórsetýdiń mańyzdylyǵyn atap kórsetti. Olardyń aıtýynsha, qazirgi tańda ıývenaldy sottyń negizgi mindeti balalardy qorǵaý, sol sebepti, peda­gogıka salasymen tyǵyz baılanys­ty áriptestik qarym-qatynas or­natýdyń máni aıryqsha. Qaýipsiz bilim berý ortasyndaǵy qaýip-qater jónindegi pikirin Petropavl qalalyq ishki ister basqarmasy ákimshilik polısıa bóliminiń ýchaskelik ıns­pektory Asylbek Ramazanov or­taǵa salsa, psıhonevrologıalyq dıs­­panserdiń psıhologi Tatána Iakov­leva balalardyń psıhıkalyq mi­nez-qulqyndaǵy ózgeshelikterdi sóz etti.
Bilim berý salasyndaǵy aq­pa­rattyq tehnologıalar jáne ádis­temelik jumys ortalyǵynyń ádiskeri Irına Iakımova bilim berý ju­my­syn uıymdastyrýdyń jańashyl­dyqtarymen bólisti.
Plenarlyq otyrysty «Órleý» BAUO jergilikti fılıalynyń dırektory, pedagogıka ǵylym­darynyń doktory Alma Myr­za­lınova qorytyp, salmaqty pi­kirler aıtty.
Seksıalyq otyrystar pedagog­tardyń, áleýmettik ustazdardyń qa­tysýymen psıhologıalyq trenıń, koýchıng, sheberlik synyp tú­rinde ótti. Bilikti psıhologtardan qu­ryl­ǵan saraptama toby konferensıada aıtylǵan ǵylymı-tájirıbelik usy­nystardy toptastyryp, bilim uıym­daryna taratatyn bolyp kelisti. Konferensıaǵa qytysýshylardyń bir tobyna arnaıy sertıfıkattar tabys etildi.
Osy kúni fılıaldyń deńgeılik baǵdarlamalar ortalyǵy uıymdas­tyrǵan «Yntymaqtastyq orta – oqý qoǵamdastyǵynyń mańyzdy býyny» taqyryby boıynsha respýblıkalyq vebınar ótkizildi.
Onda muǵalimder men oqýshylardyń tanymdyq belsendilikterin arttyrý úshin yntymaqtastyq orta qurýdyń jańa amaldary qarastyryldy. Mektepke deıingi tárbıe jáne bastaýysh bilim berý kafedrasynyń aǵa oqytýshysy Darıǵa Ábishevanyń aıtýynsha, úsh bólimnen turǵan atalǵan sharaǵa elimizdiń oblystarynan 300-ge jýyq ustaz qatysyp, oı-pikirler alysty. Deńgeılik baǵdarlamalar ortalyǵy trenerleriniń baıanda­malary tyńdalyp, belsendi áre­ket­ke jumyldyrý máseleleri qoz­ǵal­dy. Zamanaýı mektep jaǵ­daıynda yntymaqtastyq ortany qalyp­tastyrýdyń ózektiligi, muǵalimniń róli qamtyldy. Máselen, almatylyq aǵa oqytýshy, bıologıa ǵylymdarynyń kandıdaty M.Turarbekov oqytý barysynda reprodýktıvti áreketten shyǵarmashylyq áreketke ótý daǵ­dy­laryn iske asyrýdyń tıimdi joldary jaıly tájirıbesimen tanystyrdy. Shyǵys Qazaqstan oblystyq deńgeılik baǵdarlamalar ortalyǵynyń mamany G.Berikpolova Govard Gardnerdiń oqytý jáne bilim alý úderisterine baılanysty kollaboratıvti ortany qurý teorıasyn naqty mysaldarmen baılanystyrdy. Basqa da pikir bildirýshiler óz sabaqtarynda kollaboratıvti or­tanyń oqý qoǵamdastyǵynda alatyn ornyn maquldaıtyndaryn bildirdi.
Vebınardyń qorytyndy kezeńinde qatysýshylar aqparattyń tıimdiligin, usynylǵan zertteý jumystarynyń taqyrypty asha bilgenin alǵa tartty. Osyndaı ózekti taqyryptar sheńberinde jıi kezdesip, utymdy talqylaýlar uıymdastyryp turýǵa ýaǵdalasty.

Derekkóz: «Egemen Qazaqstan».