Shardara aýdandyq emhanasy týraly kópshilik rızashylyqpen aıtyp júr. Shynynda da shalǵaıda ornalasqan bul aýrýhana aýdan turǵyndarynyń kóńilinen shyǵatyndaı qyzmet kórsetedi. Shardaralyq dárigerler týraly túrli gazetterde jaǵymdy materıaldar jıi jarıalanyp turady. Jaqynda respýblıkalyq «Aıqyn» gazetinde sondaı bir maqala jaryq kórdi. Ony biz óz oqyrmandarymyzǵa jetkizýdi jón sanadyq.
Ult saýlyǵy búgingi tańda basty másele ekeni aıqyn. Sondyqtan medısına qyzmetkerleriniń aldynda halyqtyń densaýlyǵyn jaqsartý, ana men bala ólimin azaıtý mindeti turǵany belgili.
Bul oraıda aımaqtaǵy aq halatty abzal jandar oıdaǵydaı qyzmet atqarýda dep aıtýǵa bolady.
Ońtústik Qazaqstan óńirindegi Shardara aýdany – shalǵaıdaǵy aýdan qatarynda. Desek te, aýdan turǵyndaryna medısınalyq kómekti aýdandyq emhana kórsetedi. Qazir emhanaǵa kelýshilerdiń sany da jyldan-jylǵa kóbeıip keledi.
Aýdandyq emhana qyzmetiniń ońaı emes ekenin myna bir mysaldardan-aq ańǵarýǵa bolady. Shardara aýdandyq emhanasynyń quramyna – 1 ortalyq emhana, jedel járdem bólimi, klınıkalyq-dıagnostıkalyq zerthana, 13 dárigerlik ambýlatorıa (Sol jaǵalaý, İİ móltekaýdan, Jaýshyqum, Shardara, Qosseıit, Syrdarıa, Uzyn-ata, Qazaqstan, Qyzylqum, Sútkent, Aq-altyn, Dostyq, Qazaqstannyń 60 jyldyǵy), 8 medısınalyq pýnkt (Tómengi toǵaı, Neftebaza, Bımyrza, Aqberdi, Qýanqudyq, Bozaı, Quıǵan, Jaýshy-qum-1) kiredi.
Aýdandyq emhanany medısına ǵylymdarynyń kandıdaty, joǵary sanatty dáriger Janar Myqtybekqyzy Ospanova basqarady. Bul oraıda óńirde salany jas dárigerlermen qamtý máselesi jolǵa qoıylǵan. Atap aıtar bolsaq, aýdandyq emhana mekemelerine 2013 jyly 8 jas maman kelse, onyń ishinde 3 jas maman aýyldy jerlerge jiberildi. 2014 jyly 16 dáriger kelip, onyń 4-eýi aýyldy jerlerge ornalasty, 2015 jyly qazirgi tańǵa deıin 5 jas maman dáriger kelip, 1 jas maman aýyldy jerge jumysqa ornalasty. Munyń ózi óńirde jas mamanǵa qamqorlyqtyń baryn kórsetedi. Naqty aıtar bolsaq, aýdandyq emhana boıynsha – 109 joǵary bilimdi dáriger, 294 orta býyn medısına mamandary qyzmet atqarady. Mamandardyń ishinde 47 dáriger, 172 orta býyn medısına mamandarynyń joǵary, birinshi jáne ekinshi biliktilik sanattary bar.
– 2015 jyly oblystyq densaýlyq saqtaý basqarmasymen kelise otyryp, Almaty qalasyndaǵy Qazaq medısınalyq úzdiksiz bilim berý ýnıversıtetiniń mamandaryn aýdanymyzǵa shaqyrtý arqyly «Tıimdi perınataldy tehnologıalar. Júkti áıelderdi antenataldik baqylaý» taqyrybynda 15 dáriger jáne 15 akýsher kóshpeli sıklda óz biliktilikterin arttyrdy. Qazirgi tańda 1-qyrkúıekten bastap, kóshpeli sıkl taǵy uıymdastyrylyp, emhanamyzdyń 35 dárigeri «Jalpy tájirıbeli dáriger» mamandyǵy boıynsha qaıta daıarlaýdan ótýde. Aýyldyq jerlerge jumysqa jiberilgen medısınalyq jáne farmasevtıkalyq qyzmetkerlerge áleýmettik qoldaý kórsetý sharalary barysynda «Dıplommen – aýylǵa» baǵdarlamasy boıynsha 8 jas maman qyzmet atqarýda. Jaýshyqum aýylynda 1 terapevt, Shardara aýylynda 2 terapevt, 1 jalpy tájirıbeli dáriger, Qosseıit aýylynda 1 terapevt, Qazaqstan aýylynda 1 pedıatr, Uzyn-ata aýylynda 1 jalpy tájirıbeli dáriger jáne Syrdarıa aýylynda 1 jalpy tájirıbeli dáriger, jas maman retinde qyzmet atqarýda. Bul mamandar birjolǵy áleýmettik paket, aı saıynǵy komýnaldyq tólemder, páterdi jalǵa alý, jylyna bir ret kómirmen qamtamasyz etilip otyr. 2 jas maman aýylsharýashylyq bóliminiń qoldaýymen turǵyn úımen qamtyldy, – deıdi óz sózinde aýdandyq emhananyń bas dárigeri, medısına ǵylymdarynyń kandıdaty Janar Ospanova.
Janar Myqtybekqyzy Prezıdent saılaýy shtabty uıymdastyrý qyzmetin belsene atqarǵany úshin Elbasynyń «Alǵys» marapatyna ıe boldy. Sonymen qatar bas dáriger «Qazaqstan Konstıtýsıasyna – 20 jyl» merekelik medalimen marapattaldy. Janar Myqtybekqyzynyń eńbekqorlyǵy men iskerligin, sonymen qatar uıymdastyrýshylyq qyzmetiniń óte joǵary ekendigin myna bir kórsetkish ańǵartyp-aq turǵandaı. Bıylǵy Naýryz merekesine oraı aýdan kóleminde uıymdastyrylǵan merekelik is-sharada Shardara aýdandyq emhanasy bas júldege ıe bolyp, baǵaly syılyq aldy. Oblysta aýdandyq medısına mekemeleri arasyndaǵy reıtıńtik kórsetkishterden Shardara aýdany medısına salasy boıynsha 14- orynnan qazirgi tańda 2013 jáne 2014 jylmen salystyrǵanda 2015 jyly 9-orynǵa shyqty. Munyń barlyǵy medısına salasyna jaýapkershilikpen qarap, bas dárigerdiń belsendilik tanytýy arqasynda oryn alǵanyn kórsetedi.
Janar Ospanova genderlik komısıanyń múshesi retinde aýdandaǵy ana men bala densaýlyǵyna asa qatty kóńil bólip otyr. Jaqynda ǵana taǵaıyndalǵan Ońtústik Qazaqstan oblysynyń jańa ákimi Beıbit Atamqulov Shardara aýdanyna kelgen issaparynda aýdandyq emhanany nazardan tys qaldyrmaı, istelinip jatqan jumystarǵa rızashylyǵyn bildirdi. Sonymen qatar Shardara aýdany turǵyndarynyń qajettilik suranysyn qanaǵattandyrý maqsatynda birinshi aýysymda 250 kelýshini qabyldaýǵa arnalǵan jańa emhana qurylysyn 2016 jyly bastaýǵa yqpal jasaıtynyn bildirdi. Munyń ózi medısına salasyndaǵy aq halatty abzal jandarǵa jasalǵan úlken qamqorlyq ekeni aqıqat.
– Bizdiń ujym jumysynyń alǵa basýyna, ıgilikti sharalardyń jemisti bolýyna jan-jaqty kómek jasap, aq halatty abzal jandardyń baıandy bastamasyna únemi qamqorlyq jasap, isteriniń ilgeri basýyna qolǵabys kórsetip otyrǵan Ońtústik Qazaqstan oblystyq densaýlyq saqtaý basqarmasynyń basshysy, medısına ǵylymynyń kandıdaty Seıitjamal Orynbasaruly Pakeev myrzaǵa rızashylyǵymyzdy bildiremiz, – deıdi aýdandyq emhananyń bas dárigeri, medısına ǵylymdarynyń kandıdaty Janar Ospanova.
Bolashaqta aýdan ortalyǵy Shardara qalasynyń irgesinde sáýletti, zamanaýı úlgidegi jańa emhananyń qurylysy bastalmaq. Bul ıgi isti jańashyl bastamasymen kózge túsip, halyq amanatyn arqalap júrgen isker basshy Janar Myqtybekqyzy iske asyrmaq. Ǵylym men tájirıbeni birge ushtastyryp, aýyl medısınasyna úlken betburys jasap, ult densaýlyǵynyń jaqsarýyna súbeli úles qosyp júrgen jańashyl dáriger Janar Myqtybekqyzynyń ıgilikti isterin aýdan ákimi Qamytbek Nurjanuly Aıtóreev myrza da qoldaý ústinde.
Osy oraıda, ana men bala densaýlyǵyn kóterý – basty paryz. Demografıalyq dúmpýi qarqyndy Shardara aýdanynda bıylǵy jyldyń 6 aıynda myńǵa jýyq náreste dúnıege keldi. Aýdan kóleminde demografıalyq ósim kórsetkishi jyldan-jylǵa artyp keledi.
Ult densaýlyǵyn basty baǵdar etken Shardara aýdandyq emhanasynda búgingi tańda 31 kabınet jumys isteıdi. Qazirgi tańda barlyq emdeý mekemelerine engizilgen APP portaly júıeli jumys istep tur. Bul júıe arqyly árbir emdelýshiniń jaǵdaıy tolyqqandy tekserilip, tıisti emin alý úshin emdeý oryndaryna jiberiledi. Shardara aýdanynda da ambýlatorıalyq emhanalyq kómek (AEK) uıymdastyrylyp, dárigerge aldyn ala jazylyp, elektrondyq júıede jumys isteı bastady. Endigi jerde emdelýshiler elektrondy júıe arqyly kezekke jazylyp, ózi tańdaǵan mamannan keńes alady.
2014 jyldyń qańtarynan bastap, aýyldyq eldimekenderge aptasyna 1 ret onkolog, travmatolog, hırýrg, dermatolog, nevropatolog, pedıatr, akýsher-gınekolog mamandary baryp, halyqqa medısınalyq kómek kórsetip otyrady.
Elbasy atap kórsetkendeı, halyq densaýlyǵyn nyǵaıtý maqsatynda aıanbaı eńbek etý – dárigerlerdiń basty mindeti. Bul oraıda, Shardara aýdandyq emhanasy oblystyq 9 medısınalyq mekememen ekonomıkalyq kelisimge otyrdy. Atap aıtqanda, oblystyq klınıkalyq aýrýhana, oblystyq balalar aýrýhanasy, oblystyq perınataldyq ortalyq, oblystyq oftalmologıalyq aýrýhana, oblystyq endokrınologıalyq dıspanser, oblystyq kardıologıalyq ortalyq, oblystyq teri-merez dıspanseri, oblystyq konsýltatıvti-dıagnostıkalyq ortalyq jáne júkti áıelderdi genetıkalyq zertteýden ótkizý úshin «Invıvo» zerthanasy. Bul ekonomıkalyq kelisim negizinde aýdan halqy dárigerdiń joldamasy arqyly osy atalǵan 9 mekemeden tegin dárigerlik keńes alady. Últradybysty zertteýden (ÝDZ) ótip, keńesti aqysyz negizde alatyn halyq bul iske dán rıza.
Derekkóz: http://adiletgazeti.kz/
