3 qarasha kúni 31 arnada "Aıtys alańy" baǵdarlamasynyń jartylaı fınaldyq jáne fınaldyq kezdesýiniń túsirilimi bolady degendi estip, túsirilim barysyn óz kózimizben baqylaýdy jón kórip, túsirilim alańyna jol tarttyq.
Atalmysh joba kórermen nazaryna 12 qyrkúıekten bastap usynylǵan bolatyn. "Aıtys alańy" jobasy Qazaqstannyń túkpir- túkpirinen adýyndy, maıtalman 12 aqynnyń alańǵa jınalýymen bastalǵan. Olardyń qataryna talaı aıtystan qanjyǵasy qur ketpegen, aýzy dýaly aıtyskerler: Muhtar Nıazov, Bolatbek Orazbaev, Meıirbek Sultanhan, Rınat Zaıtov, Rústem Qaıyrtaı, Ershat Qaıboldın syndy aqyndar. Taǵy aıtysqa jańadan qadam basyp kele jatqan jas aqyndar da qatysty. Óziniń ádil baǵasyn berip, aıtyskerlerge synı kózqarastaryn aıtpaqqa ádil qazy alqalary taǵaıyndalǵan. Belgili aqyn, aıtys janashyry Júrsin Erman, Kompozıtor Altynbek Qorazbaev pen Baýyrjan Jaqyp tórelik etti.
- Bul jobanyń basty ereksheligi- jastardyń aıtysqa qyzyǵýshylyǵyn arttyrý, aıtysty basqa qyrynan kórsetýge, ıaǵnı tyń ıdealarmen baıytyp, basqa formatta kórermen nazaryna usynbaqqa jáne osy arqyly jas kórermenderdi aıtysqa tartý maqsatynda uıymdastyrylǵan. Aqyndar elimizdiń ár aımaǵynan kelgen soń, biz olardy turmystyq jaǵynan qamtamasyz etip otyramyz. Sondaı - aq, sharshy alańda aqyndarǵa sóz erkindigin berdik. Biz buǵan deıin de basqa jobalardy qolǵa alǵan bolatynbyz, bul joba basqa jobalarǵa qaraǵanda aýqymdy bolǵandyqtan, óz kúshimizdi salýǵa tyrysyp jatyrmyz- deıdi "aıtys alańy" jobasynyń uıymdastyrýshysy Abzal Maman.
Atalmysh baǵdarlama eki bólimnen turady: alǵashqy bólimi: "Taqyryptyq aıtys". Bul bóliminde aıtyskerlerge "Informbúroda" kórsetilgen ózekti aqparattardyń úzindisine saı tapsyrma berilip, synǵa túsedi. Al, ekinshi bólimi: "Parodıalyq aıtys". Aqyndar bul bólimde belgili bir tulǵanyń atymen sharshy alańda jekpe-jekke shyǵady, ıaǵnı bas tóreshi Júrsin Erman 9 uıashyqtyń birinen uıashyq tańdap, aqyndardyń kimniń atynan saıysqa túsetinin aıtady.
Qazirgi ýaqytta irikteý aıaqtalyp, 4 aqyn oza shaýyp aldyǵa shyǵady. Top jarǵan aqyndar jartylaı fınalda baq synaıdy. Buǵan deıin de ózekti taqyryptardy tilge tıek etken aqyndar, jartylaı fınalda "Kelin men ene", "Qazirgi serıaldar" taqyrybyn qozǵasa, aıtystyń ekinshi bólimi, ıaǵnı "Parodıalyq aıtysta" Kárim Másimov pen Imanǵalı Tasmaǵambetov, Meırambek Bespaev pen MS Saılaýbektiń atynan jyr tolǵaıdy. Al, osy eki aıtystan úzdik shyqqan qos aıtysker birden fınalǵa shyǵady. Aqtyq synda "Qazaq handyǵynyń 550 jyldyǵyn" sóz etse, parodıada Ábilqaıyr han men Kenesary bop aıtysady.
Aıta keteıik, toptan sýyrylyp, at basy alda kelgen aıtyskerlerge "Aıtys alańy" jobasy tarapynan 2 mıllıon teńge kóleminde qomaqty syıaqy tabys etiledi. Jobanyń basty demeýshisi retinde: "Arman shaı" kompanıasynyń tarapynan da syılyqtar usynylady.
"Aıtys alańy" jobasy óziniń jańa formatta, tyń bastamalardyń nátıjesinde kórermen nazaryna usynylyp otyr. Halqymyzdyń qanyna sińgen ata dástúrimizdi tanytý úshin aıtys taptyrmas qural retinde kórsetilgen, sondyqtan da bul jobanyń ult ulaǵatyn ulyqtaýǵa upaıy basym.
Gúlden Ábdibaqyt
